Vera operasyon û awbendan xeylê kesî roja 06.06.2010 de şîy Dêrsim. Sûka Mamekîye de a roje yew (ju) pêserameyîş ame viraştene û mîtîngdarî tepîya heta Dereyê Kutî (Kutudere) lingan ra şîy.
Sûka Mamekîye de bi (ebe) slogananê “Operasyonî bêrê vindernayene û Mizur azadîye rê biherikîyo” mîtîngêde girs ame viraştene. Wekîlê BDP yê Dêrsimî Serafettîn Halîs, sermîyanê KESK Samî Evren, sereka beledîyaya Dêrsimî Edîbe Şahin, hunermend Ferhat Tunc, Suavî, Hesen Saglam, Ertugrul Kurkcu û xeylê kesê bînî beşdarê nê kombîyayîşî bîy.
Serekê KESK Samî Evren qeseyê xo de vat ke “Na cografya de êndî (êdî) rijîyayîşê gonî vindero, çiqas ke ma nêwazenîme ke cêncê kirmancî û yê Fîlîstinî bimirê, hende kî nêwazenîme ke cêncê tirkî û yê Îsraîlî bimirê. Kurdî bi tirkan, tirkî bi armenîyan, muslumanî bi laîkan, elewîyî kî bi sunnîyan ra problemê xo çin o. Mesela bi dewlet a. Mesela qanûno bingeyî yê 12. êlul a. Eke şima no qanûn de kirmanc û elewîyan înkar kenê, weşîya tebîî kenê xirabine.
Ma ceng nêwazenîme. Ma nêwazenîme ke eskerî û cêncê kurdî bêrê kiştene. Operasyon herb o, ma herb nêwazenîme. Ma aştîya raste wazenîme.”
Tepîya wekîlê Dêrsimî Serafettîn Halîs va, “Ocalan werte ra vejîya û nika her roje însanî mirenê. Ma tersenîme ke no ceng her roje beno zêde.”
Ferhat Tuncî kî qeseyo xoyê kilmî de va, “Çareserkerdena meseleya kurdan bi aştîye her roje bena zore. Nika her roje koyê ma yenê bomba kerdene, însanê ma mirenê. No hukmat bi slogananê nijadperestan hêriş keno. Înan domanê ma, serekê beledîya ke hetê şarê ma amey weçinitene, hepis kerdêne. Ancîya (onca) mayê ma berbenê, ancîya koyê ma bombarduman benê û ancîya ma cêncanê xo danîme binê hardî (erdî). Birayênê, ma ewro tîya (îta) r’ îme, wazenîme ke no hal bivindernîme. Seserra ke şima kirmancan rê zulm kerdêne, ma wazenîme ke naye êndî bîyarîme vindarnayene. Êndî însan nasnameyê xo, ziwanê (zonê) xo û îtîqatê xo de biciwîyo. Ma no semed ra ewro ameyîme pêser.”
Qeseyan ra dime şarê mîtîngî lingan ra di kîlometreyî şî û reşt cayê operasyonî. Raye de xeylê sloganî amey eştene û kilamî amey vatene. Ser ra helîkopterî çerexnayêne, hezar “Özel Timi” (tîmê taybetî) û eskeran dorme de cayê xo girewt.
Heto bîn ra hîrê merdimê (mordemê) îstîhbaratê tirkî hetê cêncan ra amey pêgirewtene, xafil de nê ajanî dabanceyê xo ant (ont) û na hewa ra, nîya zereyê beşdaranê mîtîngî ra vejîya şî leweyê eskeran. Adirkerdena nê ajanî ser esker û tîmanê bînan kî bi tifonganê otomatîkan panc (ponc) deqayî adir kerd ra.
