Serekê partîya BDP yê Dêrsimî Şerafettîn Halîsî panelêde Festîvalê Mizurî de qisey kerd. Şerafettin Halîs qiseykerdişê xo de da zanayene ke Dêrsim hetê ra bi awbendan ra yeno xeniqnayayene û heto bîn ra kî bingehê îtîqadê Dêrsimî yeno çîn kerdene. Halîsî ra gore bi stratejîya viraştişê awbendan ra dewleta tirke wazena ke Dêrsim de kes nêmano û bi xeripnayîşê zîyaran temelê Dêrsimî wedarîyê.
Şerafettîn Halîsî qiseykerdişê xo nîya dewam kerd: “Dişmenanê Dêrsimî her dewrê tarîxî de xo rê armanc kerd ke komelê ma birijnê. Vizêr waşt ke ney bi surgun û terteleyan bikerê. Ewro wazenê ke no armanc bi konseptê awbendam bîyarê ca. Bi viraştişê awbendan zîyarê ma binê awe de manenê. Hetê ra wazenê ke bi barajan şarê Dêrsimî Dêrsim ra dûrî berê, heto bîn ra kî bi xeniqnayîşê awbendan wazenê ke îtîqadê ma yo ke çend hezar serrî rayberîya şarê ma kerda, çîn bikerê. Îtîqadê komelê ke bîyo vîndî, no komel bi xo beno vîndî.”
Boyna Halîsî cigêrayîşî ke kirmanckî ser o yenê kerdene, goyna û naye ser o fikrê xo nîya ard ziwan: “Herçiqas ke yew ziwan ser o xebate bêro kerdene, wa bêro kerdene, la eke no ziwan nêkewo kuçeyan, ranêxelisîno. Gerek her kes kuçe, keye û her wareyê heyatî de ziwanê xo bixebitno. Yew ziwan ancax nîya ciwîno. Nêke pêro xebatê ziwanî tal ra şonê.”
