Hewteyanê verênan de wayîrênîya erebeskî ser o werênayîşê vejîya. Ferdî Tayfur, Orhan Gencebay ya kî Îbrahim Tatlisesî ra tepîya nika Hakki Bulutî va ke pîyê erebeskî yo eslî o yo.
Hakki Bulut xogoynayîş ra vat ke “Şarî erebesk bi (ebe) vengê mi nas kerd. Ne Ferdî Tayfur, ne Orhan Gencebay ne kî Muslum Gurses, pîyê erebeskê rastî ez a. Orhan Gencebayî ra vanê pîyê erebeskî, lawo ey serranê verênan de peyê mi de tembur cinitêne! Ez nêwazena ke ey qijkek bikerîne, hama şima 20 serran de kilamanê ey ke bîyê namdar, zanenê? Yew (ju) deyîrbaz ke 20 serran de yew kilame ke hetê her ziwanî (zonî) de yeno vatene, nêviraşto, senî beno pîyê erebeskî? Muslum Gurses kî wayîrê erebeskî nîyo. Muslum besenêkeno ke kilamê binuso, biwano. Heta nika mi 56 albumî û 800 ra zêde kilamî viraştê. Na medya gerek heqa mi êndî bido.”
Hakki Bulut 1945 de Dêrsim de ame dinya. Dibistane Mamekîye û mektebo mîyanên Mazgêrd de wend. Tepîya Adana de lîse û teber ra mektebê malimênî yê Adana qedêna. Malimênîya xo de her wext tembur cinit û 1969 de Adana de musabeqaya “Vengo Zerrn” de bî yewin (juyin). Besta xoya verêna namdare “Ez birayê tuyo 3serre ra zêde çimesîyayîya to kena” bîye.
