Grûba Xebate ya Vateyî ke 1996 ra bi nat standardîzekerdişê kirmanckî (zazakî) ser o gureyena, kombîyayîşê xo yê 26. qedêna. Beledîyaya Dêrsimî, seba ke nê kombîyayîşê xo Dêrsim de bivirazo, grûbe dawet kerdbî Mamekîye.
Grûbe 29.10.2014 roja çarşemeyî saeta 08:30 de salona GENÇ-SEM de dest bi xebata 26. kerde. No kombîyayîş de nê endamî amade bîy: M.Selim Uzun, Nadîre Guntaş Aldatmaz, Ehmedê Dirihî, Ahmet Kirkan, Serdar Bedirxan, Polat Aydin, M. Malmîsanij, Mehmûd Nêşite, Huseyîn Kulu, Îhsan Aspar, Haydar Dîljen, Denîz Gunduz, Nureddîn Celalî, Zulkuf Demîrtaş, Îbrahîm Bîngol û Doxan Karasu.
No kombîyayîş de zî sey kombîyayîşanê bînan verê, rojeva kombîyayîşî virazîya. Mewzuyê rojeva kombîyayîşî nê bîy: Derheqê kar û gureyî de haydarîye, tayê çîyê muhîmî, termê peymitişî, termê zemanî, çekuyê cuya dewe, termê perwerdeyî, termê abstrakî. Mewzuyo yewin ê na rojeve ra dest bi xebate bîye. Munaqeşeyê derheqê kar û gureyî ra dima termê zemanî ra dest bi munaqeşeyî kerdê. Seba ke mewzuyê termê peymitişî derg û dila munaqeşe bîyê, babetanê bînan rê wext nêmend. Mewzuyê bînî do kombîyayîşê vîst û hewtinî de munaqeşe bibê. Mewzuyê termê peymitişî de kirmanckîya zaf termê peymitişê newe û yê muhimî virazîyê.
Roja dîyine, saeta 17:00 de qasî 20 wendekarê Unîversîteya Dêrsimî yê qisimê kirmanckî bîyê meymanê na grûbe. Nê meymanî de endamê grûbe û dima zî nê wendekarî yewbînî dayê nas kerdene. Yewbînî naskerdiş ra dima kî derheqê kirmanckî û derheqê xebate de persî persîyay û cewabê persan ame dayene.
Grûbe roja hîrêyine saeta 15:00 de salona beledîya de yew panel viraşt. Panel de panelîst M.Malmîsanijî derheqê kirmanckî de qisey kerd. Panelîste Nadîre Guntaş Aldatmaz kî derheqê folklorî de, xususî zî derheqê folklorê Dêrsimî de qisey kerd. Denîz Gundizî zî moderatorîye kerde.
Panel ra dima semedê suhbetêda şenike hemserekê beledîyaya Dêrsimî birêz Mehmet Alî Bul û endamê grûbe maqamê serekîya beledîya de amey pêser. Nê suhbetî de hunermend Ferhat Tunç kî estbî. Derheqê xebata grûbe de û rewşa kirmanckîya ewroyine ser o yew suhbeto samîmî virazîya. Esnayê suhbetî de seba raverşîyayîşê kirmanckî û bitaybetî zî Dêrsim de seba ke rewşa kirmanckî hîna rind bibo, pêşnîyazî amey kerdene.
Roja şeme saeta 12:00 de grûbe xebata xo ya 26. qedêna.
(Mehmûd Nêşite/DêrsimInfo)
