Grevê vêşanîye reştîbî roja 68.

Ez sere de grevkerdoxanê veşanîye, yanî mahkumê ke, însanê ke, wekîlê ke seba na dawa can û royê xo feda kenê, ez înan bi hîsanê xoyê germinan û pakan zere û can ra selam kena û na mucadela înan ver de bi rûmet bena çewt.

Heyyy gelê însanan, gelê dînya, gelê kurdan, gelê tirkan, gelê… êndî heşarê sereyê xo benê. Hela ravazê kê zulmkarî feqir-fuqarî ser o adir vay danê adir.

Ewro nêzana çand hepisxananê Tirkîya de grevê vêşanîye estbî. Sîyasetkaranê kurdan 12. êlule de dest bi grevê vêşanîye kerdîbî. A roje (12. êlule) ra nat xeylê waxt vêrd ra, hona kî fekê kesî ra çit çîn o, hona kî kesî xo ca ra nêlewno.

Qet bêguman ê ma kî zê her însanî kezeba ma grevkerdoxanê veşanîye re zê adirî bêhemd veşa. La ti bê bi dîyar ke zulmkar û gonîwerî, yanî dewleta tirke û hukmatê AKP  bi grevkerdoxan leqî û tirananê xo kenê.  Nê zulmkaran ra ju kî Erdogan o. Xora serê nê bêedeb de qisey kerdene kî Erdogan onceno.

No dîktator, dîktatorêde xedar û dîktatorêde zulmkar o. Heto ju ra kî dîktatorêde dirî yo. Waxto ke yeno Ewropa kî, bi linganê demokrasî, bi fekê demokrasî qesey keno û raye ra şono.  Bi rîyê xoyê qilêrinî yeno naca zur û mûran keno û şaneno raye şono.

Nê zulmkarî çêyê zafîne veşna.

Dewleta Sûrîye kamî kerde têmîyan ra?

Bi fîtne û fasadîya nê dîktatorê zurekerî Sûrîye kî têmîyan ra nêkewte.  Nê şarê Sûrîye kî verda pê û hona-hona kî verdano pê. Ribalê rîyê nê rîqilêrina ra miletê Sûrîye çol û çolistan ra wo.

Seba Heqî no dîktator çîyêde rind nêfikirîno, fikr û emelê xo xirabin ê ke çîyanê xirabinan fikirîno. Na dolime kî vaşto ra îdam ra qesey keno. Bi îdamî ters dano miletî. Waxto ke sîstemê  dewleta şima de îdam bî kî na mucadele dewam kerdêne, ewro kî na dawa dewam kena. Bi nê zulmê xo, bi na dîktatorênîya xo ti kesî nêşîkîna bitersnê.

Xora bi ters-mers dayene kî na mesela hal nêbena.  Êndî nê rîyê xoyê qilêrinî bi awa germine bişuye û berêne bi raya aştîye na mesala koke ra çareser kerêne.

Qatîbenê grevê vêşanîye her ca  gureto xo ver şî.  Seba çareser bîyena nê probleman grevkerdoxan merdene gureta çimanê xo ver.  Xora grevkerdoxî ke na seate ra tepîya grev caverdê, se beno?  A ke bîye, înan rê bîye. Hetanî ke weş benê, seqet manenê.

Çi heyf o ke ma kî verba zulmê zulmkaran de zaf  bêveng mendîme.  Zulmkaran adirê ma dard we, koke ra aj û amenê ma arde, ma hona kî vengê xo, jubîyena xo, hêz û qeweta xo ju nêkerda. Naye ra kî helbet zulmkar û gonîwerî qewete cênê.

Juyo ke xora vano ez însan a, gere ke verba nê zulm de bêveng memano.  Peyê çar dêsanê hepisxaneyê tirkan de şîyena grevê vêşanîye karê her mahkumî  nîyo.  Wa Xizir hêze û qewete û rîsîpîyênî bido grevkerdoxan.

Wusênê Gestemerde

1 ŞÎROVE

  1. No newesiya sarre mayo. 100 serro yo ke dismen ra însanîyet, mordemen, rindîye vazeme. Dismen dismeno, ey de însaf, dîn û îman çîno. Endî ney fehm bikerîme. Dismen tena dismenîye keno…

Comments are closed.