Goga gilorek a, ma sîyaset? – İlhamî Sertkaya

Goga giloreke, reyna bi şampîyonê Ewropayî, bi mîlyonan dima xo de çarna. Bi mîyon kesî, bi kelecanîye, çimanê xo, dima goga giloreke ra ard û berdî. Sîyaset, qasê goga giloreke, handay kesî, bi kelecanîye dima xo ra nêbeno. O sîyaset o ke, ma ebe êy kunîme ra, hasar benîme. Şima goge çiqas qijkek vînenê, bivêne, wilay goge, sîyaset keno binê linganê kaybazan. Bi hazaran maqaleyî binusîyê zî, qasê çend çekuyê ke waxtê kaykerdena goga Ewropayî de, mesajê kilmî wendêne, ne nas benê, ne zî goşdarîye kenê. O waxt zerreyê mi lerza. Mi xo bi xo va ke; ‘ ‘Se bîyêne, bi zonê ma, mesajêde kilm bîyamêne wendene’.Ame aqilê mi ke, ez ke o ca de bîyêne, yanê Polonya ya zî Ukrayna de, mi reca kerdêne ke, ju ekîb, bi zonê ma mesaj biwendêne. Nê bawo, nê! Xemê kamî yo ke zonê ma? Dinya çimanê xo virda goga giloreke, ma zî hîna bi Tayîb û zonê ma yo ke ma ra wazenê bibê ‘dersa weçînîteyî’ mujxul bîme.

Tayîb, qanun û manunê Tirkan, seba mi, rojeva mi de rew ra qedî yo. Vanê ke, haşa ‘her çiqas zireno, biziro’. Karê mi ebe cahîl û zurekerê Tirkan qedîyo. Ez bi zonê xo qesî kena, wanena, nusnena, naye ra tepya ‘zire-zira heran’, mi eleqedar nêkeno. Ma va, goge gilorek a, ma sîyaset? Keko sîyaset, ne gilorek o, ne teng o, ne kilm o, ne derg o. Se ke Mehdî Zanayî, seba zîndanê Amedî vatbî ‘ vanê ke zîndanê Amedî, cenem o, nê! Wa xwezila cenem bîyêne! Cenem de, mordemî ercenê adir, mordem vêşeno û qedîno, la îta de mordem ne vêşeno, ne qedîno’.

Sîyaset, bi taybetî sîyasetê tirkan nîya wo. Çend nefşî, ebe şanik û çîrokan, ebe zur û hîlekarîye emrê bandura xo ya înkarî ramit û rameno. De o ke ma qalê sîyasetê Tirkan kerdo, tenya di numuneyê balkeşî bidî;

1-Îsraîli, new hemwelatê Tirkan kişt, Tirkan se kerd? ‘Niç’ yanê qet

2-Surîya tîyareya Tirkan dêm da, Tirkan se kerd? Reyna ‘niç’ yanê qet çîyê nêkerdî.

Sebeb? Nêşikîyayî. Ma, qey hona welatê ma bombe kenê? Çi ke, tîyareyê ma çîn ê, keko. Naye ra dot, pêro analîz û teorîyî zur ê. Sîyaset, nîya wo. Sîyaset de wîjdan, meramet, heqîye nê, menfaat esto. O menfaato ke, Homayî xapneno, mordemîye ra leqe keno! Ma, bime qedayê nê menfaatê gonîwer û qilêrî.

‘of sîyaset of’! Mi Sarreyê koyan û gilê daran ‘çik û çinayê to ra kerdêne’! N’êro Hîtleran, Musolînan, AtayêTirkan, Saddaman se kerdî? Ma nika kotî der ê? Waxto ke Lêyla Xanime ebe Tayîbî amêyî têwlewe, naye bivatê bes bî’ Ero biko, ti zî rojê kuna binê hardî, lawo meke’!Ya zî sareyê ‘anitqabîrî bige çik û çinayê xo ke’!

Yanê ez pereyê xo dana, bi desturê Tayîban, zonê xo misena ha!Lawo, lawo, lawo!A mamostatîya ke mi ju serre bi Tirkî kerdbî, verende xenîmê mi bo, dime ra xenîmê şima bo, biko!

Ya goga giloreke! Ti şala serê nê sîyasetê qefçilî ra gilêr bê! Nika çimê mi, verba tîja sodirî ra xo virdê ra. Serê awa deryayî de, pêlê birqîyayî, bi hazaran noqte, perda xo hîra fîsta ra. Nika ju doman, ju dewa Dêrsimî de, qilêrîya asîmîlasyonî ra, kincanê xoyê qilêrî, giran bi giran veceno. Ju xanima kokime, îzmir de, seba dewanê vêşayî, pencere ra qayîtkerdena xo virda ra, lornena, a kilame vana;

‘Dewê, dewê’! Nika kam çi bizano ke, welatê ma yo ke dewleta xo ra marum o, kamcî neqebe, kamcî zime, kamcî fireqetîye û şênatîye ser o adir vareno?

Gonîya ma wa ke rişîna, ne xemê Dinya wa, ne zî xemê goga giloreke wa. Dewleta to ke çînî bo, goga to ‘giloreke’ nîya keko! Ha kay bike, ha kay bike! Wa xorê Spanya qezenc bikero, ma zî na şabîyena înan sêr bikime. Xora çimê ma yê pirî, dima şabîyena şarî de, henî melun, henî bi qayîtkerdena girane manenê.

Of! Ez cixareyê xo bişimî! Mi ra qalê ‘tirtik û virtikanê’ sîyasetê Tirkan mekerê. Hal û merhaleyê zonê ma û ‘qaşo roştîbîrê ma’ senên ê? Ez zanena ‘senên ê’. Şima ra vajî? Nê! Nêvana ez. Tenya naye pers bikerî, cuwab zî şima bidê;

Na Dinya de, tenya bi zonê ma ra ju rojname, televîzyon esto? De vajê! Doyê ma zê zaf ‘roştîbîrê ma, tirş o tirş’! Vanê ke, ‘kes nêvano doyê ma tirş o’. Willay, Xizir bo, ez vana.

‘Do, tirş mebîyêne, mi zî mevatêne’ Mi ra çi? Zonî mekerê qedayê sîyasetî, sîyaset bikerê qedayê zonî.

Hamnan o nika, germ o.Seba ke germ o, bêzar mebê. Serd ra zî şima lome nêkerdêne? Şima ne serd ra, ne germ ra qayîl benê. Mordem nîya tayê ecêb o.Ez xorê ju goge bigêrî, qesasê vêşanîya domantîya xo ra tayê kay bikerî. Eke qefelîya, doyê tirşî nê, awa zelale bişimî ez.

‘Tirş memanê’, weş bimanê.

İlhamî Sertkaya

3-7-2012