12. hezîrane de sindoqî ronîyayî, şarî rayê xo da. Wa bixeyr bo…
Nêbeno ke merdim heqê ci înkar bikero. Rojhelato Mîyanên de goreyê dewletanê bînan Tirkîya hîna serbest a. Demokrasîyê xo zêde xurt mebo zî çendayê partî estê, şar eşkeno ci ra yewere tercîh bikero. Ancî tespîtbîyayîşê namzedan de qisaya şarî vîyarena. Endam û terefdarê partîyêk meylê xo eşkera kenê ke namzedê înan kam bo.
La nimûneyê winasî estê ke ne bi demokrasî û serbestîye ne zî bi dîktatorî û zorbazîye îzeh benê.
Kamer Genç mesela.
No gîyo çeqer hîris serrî yo ke parlamentoyê tirka de mebusê Mamekîye yo. Des serrî ney, vîst serrî ney, hîris serrî! Şarê Mamekîye 12ê hezîrane de şi sindoqan ser; k…ê herî sey verî!
Mîyanê hîris serran de çend hukmatî çend serekwezîrî çend serekkomarî ameyî û şîyî, o cayê xo de mend û mend!
Seba Suleyman Demirelî bi tinazkî û sîtemkarîye vatênê “Süleyman hep başbakan, başbakan hep Süleyman…” Rehmet şoro bi Suleymanî lanet şoro bi ney! Suleymanî qet nêbo ge-gane sereyê xo vîndî kerdêne. Ge-gane eskeran paskul dayêne fekê qine ro!
Ma Kamer Genç?
Qet aqilê mi nêşino ser ke şarê Mamekîye se rayê xo dano Kamer Gençî? Se zerrîya xo gêna?
Ma bivajê ke partîyê sey CHP ra zaf hes kenê! Ma bivajê ke meylê xo çepgirîye ser o yo.
Ma nê partîyan de yewbîna merdim nêmend! Boya Heqî, yewbîna merdim çin o ke herinda Kamer Gençî de namzed nîşan bidê!
Ma çepgirîye bivajê… Çi eleqeyê nê qeşmerî û çepgirîye!
No mêrik şarê xo nêzano.
No mêrik kulturê xo nêzano.
No mêrik îtîqadê xo nêzano.
No mêrik ziwanê xo nêzano.
Înanê ke parlamentoyê Tirkîya de şarê xo û raydayoxê xo temsîl kerdî; seba heqanê înan kişîyayî, hepis de mendî, nefî mendî, sereyê xo şikîya, rastê gef-gurrî ameyî…
Ma Kamer Genç?
Şima caran dîyo ke kesî ey rê xeberêk vata? Nêvata! Çike o bi heq-huqûqê şarê xo û raydayoxanê xo eleqedar nîyo.
Cuwa ver çi bîyo, ez ey hesab nêkena. Hîris serrî yo ke şarê Mamekîye binê çuweyan de nal-nala xo yo. Û hîris serrî yo ke no mêrik mebusê Mamekîye yo. Caran rojêk teba vato? Ney! Qet ewkê ey ra nîyo!
Dewê Mamekîye veşayê; qet ewkê ey ra nîyo!
Mamekîye binê awe de manena; qet ewkê ey ra nîyo!
Mamekîye de birr nêmend; qet ewkê ey ra nîyo! O bi awdayîşê vilikan wa meşxul o!
Mi zaf kesan ra hesnayo ke vanê “Kamer Genç îşgoren o!”
Ez nêzanena ke ney çi “îşgorenîye” kerda? Çi xizmete berda Mamekîye, xatir û xebata ey ser çi sermaye ameyo ronayene, şar se xo rê bîyo wayîrê kar û gureyî? O yo ke ez zanena, şarê Mamekîye betalê betalan o.
Ey şarê Mamekîye, na qisaya mi to rê!
Tiya ke rayîrê averperwerîye de xo ra ver kesî nêvînena; Kamer Genç eyneyê to yo, rind piro nîyabide (biewnî), hal-hewalê xo bivîne!
Qet AKP û Erdogan mevaje û xo erd ro mekuwe. AKP û Erdoganê to Kamer Genç o. Ti ke ey ra xelisîyaya, înan ra zî xelisîyena.
Qet asmênê hewtine puf meke! Xo ra cêr welatanê ereban ra nîyabide. Seba ke kesanê sey Kamer Gençî ra bixelisîyê, gonîya xo danê, canê xo danê. Ti şona sindoqan ser, raya xo dana û Kamer Gençî kena taca sereyê xo. De bixeyr bo to rê!
Heq ko vîneno, vewre varneno!
Murad Canşad
Kam zone ma qisey keno ke. Tena Kamer Genc ney, cepgiri, sosya
İte mak propagandaye xo Tirki virazene. İtikate ma Cemevin de ebe tirki yeno xiravin kerdene. Sare Dersim vayire zone xo nivecino. 90 serro reke katige kulture Dersim yeno werdis, hona besenikerd ke biqedene. Kemalisti, Sosyalisti, Aleviy, Tarikata Gülen, Esekeran Tirk… endi gerekeke sare Dersim vazo ke ey Sosyalisti eke sima vazeneke Dersim de siyaset bikere, kirmancki bikere. Eke vazeneke propagamdaye Marx, Mao bikere, kitabine xo kirmancki binuse. Hete binrak itikate ma endi tena zone made biyaro virastene. Zonke bi vind, Dersim beno vind, itikat beno vind, kamiye beno vind. Yani be zon be kirmancki Dersim beno vind u tariye tarixte xenekino…
Bere endi heyate ebe kirmancki binizme!
Mi no nuşteyê kek Murad wend, hem ez pê şa bîya ke nuştoxê ma sey kek Murad estê û wayirê ziwanê ma vejîyenê, hem zî ez zaf xemgîn bîya ke bi no qayde merdiman servetê û xezînayê şarê ma yê, çi heyfa ke hefs û zîndanan de yê..Dewleta tirk hetta ke roşnvîr û qehremananê ma veranêdo ez bawer nêkena ke yew aştîye bivirazîyo..
Aştîye nîna, no mumkîn nîyo. Sima bawer kene ke dewleta Tirkî asîmîlasyona texelîna? Na dewleta tepîyaye xeletiya siyasetan Kurdan onca bawe keno le asîmîlasyone sare Kurdî hata 2023 qedeneno. Siyaseta reformisfe je Demokratik Cumhuriyet, Çatı Partisi sare Kurdan ra qe xeyr niano. Hazar serre mare musna ke Tirki de piya ciwiyayis nibeno. Kam ke onca vazenoke na raye ra şero, bizone ke be ma sone.
Destê to tern bî Murad o.