Rojnameyo alman Frankfurter Rundschau qetlîamê Parîsî ser o vindet, bitaybetî nasnameyê meznûnî Omer Guney ser o nuşt.
Yeno nuştene ke înfazê Sakîne Caniz, Fîdan Dogan û Leyla Şaylemez ra tepîya dozgerê Komara Fransa Françoîs Molînsî hemwelatîyê Tirkîya Omey Guneyo 33 serran sey meznûnê bingeyênî eşkera kerd. Seba ke Guney hetê kamerayanê vîdeoyan ra banê komela kurdan de ameybî dîyene û seba ke çenteyê xo de rêçê barutî amey dîyene, Omer sey sucdarê nê qetlîamî yeno dîyene. Molînsî ra gore Guney da zanayene ke o bi xo di serrî endamê PKK bî.
Coka dewleta Tirkîya desinde no qetlîam sey “hesabkerdişê zereyî” nîşan da. Labelê goreyê Ajansa Xeberan a Firatî (ANF) ra serekê PKK Murat Karayilanî eşkera kerd ke Omer Guney qet wext endamê PKK nêbî. Karayilan texmîn keno ke Guney di serran ra ver qestî ame berdene zereyê dorûverê PKK.
Omer Guney kam o?
Goreyê hesabê Facebookî yê Omer Guney, o sey dergewanî meydanê teyara yê Parîsî Charles des Gaulle de gureya. Cigêrayîşê ANF ra gore serra 2010 de Guney reya verêne kewt komelê kurdan. O wext ey yew waştişnameyê endamîye daybî komela kurdan. Dima, rey-rey odayanê komele de ame dîyene.
Verê cû, yew hevalê oda yê Guney Y.A. daybî zanayene ke Guney semedê zanayîşê xo yê franskî ra sey tercumanê komele gureyayêne. Guney vatîbî ke pîyê xo kurd, maya xo kî tirk a. Labelê badê ke rojnamgeran keyeyê Guney Sêwas de zîyaret kerd, înan vatîbî ke “hur tirk ê”. Hetta keye hertim duştê PKK de bî û muxtarê dewe ra gore kî weçînitişan de seba partîya netewepereste MHP rê ray day. Apanê Omerî Zekaî û Ahmet Guney kî ard ziwan ke ê “keyeyêde nasyonalîst ê”
Pancserrîya xo de Omer Guney bi keyeyê xo şî Fransa. Uca de pîyê xo kar dîbî. 20serrîya xo der Guney eyaletê Almanya Bavyera de zewejîyabî, cîyabîyayîş ra dime ke di serran ra ver bî, ancîya gêra ra Parîs. Vatena Y.A. ra gore Guney bêveng û sakîn bî. Çîyo ke bala rojnameyî ante, no bî ke Guney goreyê standardê xo yê maddî de nêciwîyayêne. Reyê, verê Ferrarî de resimê xo ant. Polîs ra gore kî 45 taximê xo yê kincan û 5 telefonê xo yê destan estbîy.
Hevalê xo yê oda Y.A. ser o kî melumat da ke Guney heyranê çekan bî. Ge-ge tayê rojî bîbî vîndî, bê ke xebera kesî ci ra estbo. Nika yeno zanayene ke Guney serra 2012 de hewt reyî şîbî Tirkîya – feqet keyeyê Guney lajê xo Sêwas de qet nêdî. Aşma kanûne de Guney hîrê rojî merkezê Anqara de yew otel de bî. Sebebê raywanîyan hîna nêzanîno.
Maneno ro Qetilê Dînkî
Frankfurter Rundschau ra gore bîografîya Omer Guney manena ro yê Ogun Samastî ke serra 2007 de rojnamegero armenî Hrant Dînk kiştîbî. Sey Guney, Samast kî dorûverê nasyonalîstan de bî. Serra 2010 ra dime nêzdîyê Munîhî Schlîersee de roniştişê Guney estbî. Uca xeylê tirkî estê ke goreyê melumatanê ajansanê kurdan ra terefgirê Bozkurtan ê. Hesabê xo yê Facebookî de Omer Guney xo sey terefdarê partîya muhafezkara dîndare AKP nîşan da û da zanayene ke heyranê rêzefîlmê “Newala Vergan” o.
Nê pêro melumatî xeylê kurdan rê bîy delîl ke înfazê Parîsî yew komplo bî.
