Festîvala reqis û kulturê kurdan “Mîhrîcan” emser reya 32. şaristanê Almanya Hannover de virazîyaye. Na festîvala ke tim di rojî şona, Ewropa de festîvala kurdan a tewr kan a.
Pêro pîya vîşt û new komî bîyî beşdarê festîvale û bi kay û kilaman urf û edetê war û welatê xo musna ra zîyaretkerdoxan. Şayîye heştê hezîrane, Meydanê Ernst-Augustî yê Hannoverî de ca girewt û bi defîleya kincanê kurdan mîyanê şaristanî ro vêrd ra. Pêro endamê defîle bi kincanê kurdan bala beşdaran ante. Sazkerdoxê festîvale komela “Govend Europa e.V.” bî.
Defîle ra dime roja bazarî yew jurî kilam, govend û koreografîyan ra heta kincan têde komî şanayî têver û înan mîyan ra ê tewr rindî çînitî we. Koma camêrdan “Dilana Roj Arya” ke Parîs ra tewrê festîvale bîye, cayo yewin girewt. Cayo dîyin kî şî eynî kom, la na fay beşê cinîkan xelate girewte. Rêzo hîrêyin bî yê koma “Grup Sîyar” a ke Almanya ra tewrê festîvale bîye.
Xelata kincan a Mîhrîcanî kî bîye para koma “Dilana Roj Arya”. Çi esto ke na rey a wayîra xelat a yewkeke nêbîye. Aye xelata kincan koma “Govenda Baran” de pare kerde. Koma Govenda Baran Koln ra bîye beşdara festîvalî.
