Sempozyumê “Perwerdeyê Zafziwanî yê Ziwanê Dayîke yê bibingeyî” de ke hetê Egitim-Senî ra Îstanbul de virazîya, serekê Enstîtuyê Kurdî yê Îstanbulî Zana Farqînî qisey kerd û va ke asîmîlasyonê kurdan hîna dewam keno. Zanayî ra gore kanalê dewlet ê kurdkî TRT6 “weşanê kurdkî nêkeno.” Ziwanêde xerîb de weşanê xo keno.
Sempozyum de ke tey temsîlkarê laz, çerkez, ereb, suryanî û kurdan beşdar bîy, waştişo bingeyên perwerdeyo resmî bi ziwanê dayîke bî. Qiseykerdoxan ra serekê Enstîtuyê Kurdî yê Îstanbulî Zana Farqînî qisey kerd. Farqînî rexneyê sîstemê sîyasetê Tirkîya, bitaybetî babeta nasname û ziwanê dayîke ser o kerd. Farqînî: “Pîlanê ma ma ra vatêne: biwanê, bibê merdim. Merdim bîyene, tirk bîyayîş bî. tirkî qiseykerdiş bî. Nê polîtîkayî seba her kesê ke tirk nîyo, amey viraştene. Ferqê kurdan no yo: kurdan hertim xo ver ro dayêne, kulturêde xoverrodayîşî estbî. Duştê asîmîlasyonî de xo ver ro da, bedêlê xo kî giran-giran da, hîna dano.”
Dewamê qiseykerdişî de Farqînî da zanayene ke bes nîyo ke merdim ziwanan mekteb de bimusno, gerek yew ziwan bikewo têde waranê heyatî. “Asîmîlasyon ewro tenêna barî dewam keno. TRT Şeş, mavajîme, weşanê kurdkî nêkeno. Ma ra gore bi ziwanêde xerîb weşanê xo keno. “
