Akademîya Pedîyateran a Amerîka (AAP) ra gore portalê cematî yê Înternetî Facebook tayê doman û cêncan de depresyon, hetta depresyono giran, ano meydan.
Bitaybetî cêncê ke cuya normale de henî sosyal pêt nîyê, ê Înternet de Facebook ser o xeylê “hevalan” kenê lîsteya xo û xeylê resim, kay, aktîvîte ûsn. pê jubînî (yewbînan) pare kenê. Seba ke qiseykerdiş û têkilîya Înternetî de merdim (mordem) besenêkeno ke duştê xo bivîno, jest û mîmîkê kesî ra tespît bikero, resimî kî tena benê parçeyê rastîye. Pisporanê AAP ra gore may û pîyî ser o baldar bê û domananê xo de tehlukeyê Facebookî û îzolasyonê Înternetî ser o qisey bikerê.
Tehlukeyo bîn kî o yo ke Facebook ser o xeylê kesî roje bi roje resimê tatîlî, aktîveteyê xoyê sosyalî, kinc û hacetê neweyî, herînayîşê markayan, hevalê/hevala xo ûêb. musnenê milet ke no tayê cêncan de ke înan de nê çîyî çin ê, problem û çimsîyayîye tey ano. Seba ke Facebook platformêde keyf û şayî yo, her kes wazeno ke aktîvîte û resimê xo bibê populer. No kî ju (yew) musabeqaya giran a ke wextê xeylê cêncan cêno.
Heto bîn ra DYA de ame dîyene ke tayê cêncî semedê nerehetkerdiş û terorê hemserranê xo ra xo kişt ya kî kotê depresyonan. Labelê no problem pêro Înternet de esto, sirf Facebook ser o zaf rehet beno vila. Tesîrêde xirabin parçebîyayîşê nasnameyî seba psîkolojîya doman û cêncan o.
Pisporî vanê, eke juyê (yew) heyato rast tek nas kerd, plaftormê sosyalî jê (sey) Facebook çîyêde rind o. Uca (uza) însanî şikînê jubînî (yewbînan) de qisey bikerê, resim û aktîvîte pare bikerê, hevalanê neweyan bivînê, fikranê xo jubînî (yewbînan) de pare bikerê ûsn. Labelê seba însanê ke teyna manenê, bitaybetî doman û cêncan de, girêdayîşê ê portalan de tehlukeyê esto.
her biji hewalno gellek spas hatire te