Jenosîdê Dêrsimî ser o 75 serrî vîyart, labelê travmayê dêrsimijan ke no qirkerdiş dîyo, hîna dewam keno. Qulê ke 75 serran ra ver ame raqilaşnayene, hîna gonî dano. Serranê 1937 û 1938 de bi des hezaran dêrsimijî hetê dewleta tirke ra amey qir kerdene.
“Kutikan meyîtê may û pîyê mi werdî”
Dewa Mamekîye Bor ra Uşen Gul wextê jenosîdê Dêrsimî de bi 40 doman û cinîkan dewa Hovar ra destragirêdaye hetê eskeranê tirkan ra amey berdene çemê Harçîkî. Uca de pêro ameybî kiştene. O taw Uşen Gul 10 serrî de bîyo û derheqê ê serran de nîya qisey keno: “No qetlîam ra tena ez û dewa ma ra Bedrî Polat xelesîyayîme. Tepîya birr de dirbetin xeylê aşmî xo dardo we. Semedê ginayîşê qersune ra destê mino rastî seqet mend. Yew kî, semedê qersuna ke ginaybî çeneyê mi ro, mi xeylê aşmî besenêkerd nan biwerîne. Bi destanê xo kermê çeneyê xo vet. Pî, maye, xalike, xal û pêro birayê mi amey qir kerdene. Têde meyîtî eştî çem. Eskeran bawer kerd ke ez merdo, ez kî henî eşto awe. Hîrê rojî awa çemî de xo resa tel û kolî henî xelesîyo. Kutikî amey, meyîte însanê ma werdî, înan ra meyîtê may û pî, birayanê mi kî kutikan werdî. Dima xortanê Dêrsimî ke duştê eskeran de pêro dayêne, ma uca ra xelesnayîme.”
“Ez na dewlete ef nêkeno.”
“Na dewlete çend sey serrî ma kişeno. Yew dewleta ra ke may û pîyê to verê çimanê to kişeno, çitur hes kena? Na dewlete ez 10 serrîya xo de maya xo ra kerdo cîya. Ez na dewlete ef nêkeno.”
