Goreyê spîkerê çapemenî yê Wezaretê Pêşmergeyan ê Herêma Federal a Kurdîstanî Helgurd Hîkmetî ra, heta nika çekê DYA û Fransa reştî pêşmergeyan. 

Boyna, welatanê Almanya, Îtalya, Kanada, Îngilîstan û Komara Çeke qerar da ke çek û malzemeyê eskerî birusnê. No derheq de Hîkmetî va ke “Nê welatî plan û projeyê rusnayîşê çek û malzemeyê eskerî kenê. Înan da zanayene ke badê ke kirarîya resmîye temam bîye, çekan do birusîyê.”

Hêrişê terorîstanê DÎ ra dime, pêşmergeyanê Herêma Kurdîstanî xeylê welatanê rojawanî ra sozê çekrusnayîşî girewt. Bitaybetî îhtîyacê pêşmergeyan bi çekanê giranan esto. Çekê ke yenê, pê Wezaretê Pêşmergeyan vila benê hêzanê pêşmergeyan. Goreyê melumatê wezaretî ra malzeme û çekê cengî “tena duştê DÎ de yenê xebitnayene.” Qisimê malzemeyan kî bêpere, yanî sey ardim amey rusnayene.