Festîvala 10. ya kultur û tebîetî ya Mizurî ewro, 29. temmuze de, dest keno ci (dest pêkeno). Sloganê festîvale na rey “Dêrsim de 38êde bîn nêwazenîme – Bi (ebe) kultur, nasname, îtîqad û Mizurê xo azad bîme” yo. Emser kî her cayê dinya ra xeylê hezar kesî şonê Dêrsim. Xeylê nuştox, roşnvîr û hunermendî na festîvale de yenê pêser. Mewzûyo emserên “Îtîqad û Kulturê Dêrsimî” yo, la tede kî xeylê mewzûyanê sîyasîyan ser o yeno vindetene. Panel û qiseykerdiş ra îtîqadê Dêrsimî ser o qisey beno. Heta nika merdimî (mordemî) ke îtîqatê Dêrsimî vatêne, ey ra elewîyênî fam bîyêne. Giran-giran yeno ra ziwan (zon) ke îtîqadê Dêrsimî bi elewîyîya Tirkîya ra yew (ju) nîyo.
Mizgînêde bîn: 72 serran ra tepîya na festîvale de heykelê Seyîd Rizayî yeno rakerdene. Seyîd Riza serra 1938 de hetê ordîya Tirkîya ra ameybî dardekerdene. Festîvala Dêrsimî de ser o kî xeylê fîlm û dokumenterî yenê musnayene. “Şawakan” yê rejîsorê kurdî Kazim Ozî, “Kilamê Vîndîbîyayeyî yê Anatolîya” yê Nezîh Ozenî û fîlmê bînî pêşkêşê qayîtkerdoxan benê. Serê meseleya kurdan û cinîyan kî tayê semînerî yenê viraştene. Kirmanckî û edebîyatê kirmanckî ser o kî xeylê panelî estê, tede kî nuştoxê namdar sey (jê) Denîz Gunduz, Munzur Çem û Roşan Lezgîn ca cênê. Roşnvîr û sîyasetvanê namdarî no esna de fikrê xo anê ra ziwan.
Sey her serre muzîkê rock ra heta muzîkê protestî, hîp-hopê kurdkî ra heta dengbêjan, hewayî ra heta şîîran tahmê (tomê) her kesî ra gore zîyafetê muzîk esto. Koma Hivron, Erdogan Emîr, Ayfer Duzdaş, Aşye Şefaxî, Serhado, Aynur Dogan, Ferhat Tunç, Agirê Jiyan, Grup Munzur, Alî Ihsan Doga, Huseyîn Dede, Volkan Yagan, Ento, Bajar û Suavî deyîrbazê festîvalê Mizurî yê.
