Kombîyayîşo hîrakerde yê AKP yê serekanê qezayan de serekwezîrê Tirkîya Recep Tayyîp Erdoganî qisey kerd û derheqê jenosîdê Dêrsimî de belgeyê neweyî eşkera kerd. Erdoganî muhtewaya nê dokumanan ju (yew) bi ju (yew) wende û serekê partîya CHP Kemal Kiliçdarogluyî rexne kerd. Qiseykerdişê xo de Erdoganî va ke “Eke lazim a ke bi nameyê dewlete ozr bêro waştene, ez ozr wazena.”

Pêro pîya Erdoganî çar dokumanî derheqê jenosîdî de îzeh kerd. Ju (yew) derheqê wîlayetê “Tuncelî” de qanûnêde serra 1935 yo, ju (yew) kî mektuba cendirme ya ke 8. tebaxa 1939 de ameye rusnayene û ke tede bîlançoyê mudaxeleyanê Dêrsimî esto. Belgeyo hîrêyin qerarnameyêde Îsmet Înonuyî yo, dokumano çarin kî raporê operasyonanê teqib û pakkerdişî yo. Erdoganî naye ser o va ke “Dêrsim de operasyon esto ke çarçewaya ci game bi game ameye xêz kerdene û ke mahnê ci amey hazir kerdene.”  Bîlançoyê operasyonanê Dêrsimî ra gore serranê 1936-1939 de 13.806 kesî amey kiştene.

Badê eşkerakerdişê belgeyan Erdoganî venga serekê CHP Kemal Kiliçdarogluyî da va, “Ez hîna se vajîne? Ez bi dokumanan qisey kena. Şo bikuye arşîvan, rastîye vaje. Sîyasetê nê pêrune durustnêbîyayîş ser o virazîya. Dêrsim tarîxê mayo nêzdî de trajedîyanê tewr xirabinan ra ju (yew) ya. Gerek serebûtê Dêrsimî îzeh bibê. (…) Wayîrê nê eserê goninî CHP ya. Parlamenterê Dêrsimî yê CHP yê. Sereko pêroyî dêrsimij o. (…)

Kiliçdaroglu, ti kata remena? (…) Ma ez ef biwazî ya ti? Eke lazim a ke bi nameyê dewlete ozr bêro waştene, eke lîtaruterêde nîyanên esto, ez ozr wazena. Labelê eke kes esto ke gerek bi nameyê zîhnîyetê CHP ozr biwazo, o ti ya.”

Qiseykerdişê serekwezîr Erdoganî ra tepîya ewro serekê qeza yê CHP yê Dîyarbekirî Muzafer Degerî da zanayene ke o kî seba qetlîamê Dêrsimî ef wazeno. Labelê qiseykerdişê Degerî ra ver merkezo pêroyî yê CHP ra ame dayene zanayene ke Muzaf Deger wezîfeyê xo ra ame girewtene û wexto ke ozrê xo seba jenosîdê Dêrsimî waşt, bi nameyê CHP nêwaşt.