Erdogan tehdîdê qedexekerdişê YouTube û Facebookî keno.

Serekwezîrê Komara Tirkîya, Tayyîp Erdogan, ke semedê skandalê rişwetwerîye ra nika binê tedaya girs a sîyasî der o, wazeno ke Facebook û YouTube qedexe bikero.

Seba ke parçeyê neweyî yê telefonkerdişê ey vejîyay meydan, Erdoganî yew reportajê kanalê ATV de va ke weçînitişanê 30. adare ra dime “tedbîrê neweyî” nê mewzûyan ser o yenê girewtene. Nînan tede kî qedexekerdişê platformanê Înternetî esto. Erdoganî ra gore nê servîsê Înternetî hetê dişmenanê xo yê sîyasîyan ra duştê ey de yenê xebitnayene û ser o kî welat rê zerar danê.

17. kanûne de reya verêne mesela rişwetwerîya Erdogan û nasanê xo vejîyaybî meydan. Tayê nasê Erdoganî ameybî tewqîf kerdene, tayê wezîranê AKP kî îstîfa kerd. Goreyê Erdoganî nê sucdarkerdişî hertim komployê hêzanê dewletanê bînan ya kî ceribnayîşê darbe yê. Badê, Înternet de parçeyê telefonkerdişê Erdogan bi lajê xo vejîyay. Tede Erdoganî lajê xo ra va ke pereyan wedaro. Erdoganî ra gore nê qiseykerdişê telefonî kî rast nîyê, viraşte yê.

Serekwezîr Erdoganî va, eke weçînitişê na aşme de partîya xo AKP bin kewo, Erdogan do îstîfa bikero.