“Konferansê Kurdîstanî yê Tirkîya” roja xoya dîyine de qedîya. Konferans rojanê 17-18 ê na aşme de Dîyarbekir de bi 182 delegeyan otelê Clase de amade bîbî. Badê munaqeşeyanê di rojan encamnameyêk ame amadekerdiş. Na encamname hetê hetkarê serekê HAK-PARî û endamê Koordînasyonê Konferansê Netewe Hasan Dagtekîn ra ame wendiş.

Na encamname de ame waştiş ke muzakereyê ke hetanî nika bi serekê PKK Abdullah Ocalanî reyde virazîyê, wa bêro dewamkerdiş û hukmat operasîyonan bivinderno.  

Dagtekînî dîyar kerd ke ronayîşê xo ra hetanî nika Komara Tirkîya şarê kurdî heme heqanê xo yê însanet û cîhanî ra merhum kerdo. Dima winî dewam kerd: “Şaro kurd heme heqanê xo yê merdimî û cîhanî ra ameyo mehrumkerdiş. Şarê Kurdîstanî, suryanî, armenî, ereb û zaf komelê bînî û bawermendê êzîdî, elewî, sunî û bawermendê bînî yê ke kurdan reyde ciwîyenê, rastê înkarî yenê. Beşdarbîyayoxê nê konferansî dejê komkiştişê serra 1915î zereyê xo de hîs kenê”.

Dagtekînî dewamê qalkerdişê xo de va: “Konferansê ma operasîyonê Tirkîya û yê Îranî yê ver a Mintiqaya Federal a Kurdistanî û heme operasîyonê bînan şermezar kena. Şaro kurd bi vindertişê xo yê hembare,  heme operasîyonan ver a ameyîşê xo eşkera keno. Konferans vano ke herinda operasîyonanê sîyasî û eskerî de wa ziwanêko aştî bêro şuxulnayîş.

Encemname û qiseyê ke konferans de ameyê kerdiş do demêko nêzdî de sey yew kitab de bêrê çapkerdiş.

Mehmud Nêşite/DI