Ekonomîya DYA hîna binê tesîrê krîzê fînansî der a. Subvansîyonê hukmatî, peyserherinayîşê emlakan hetê bankayan ra û tedbîrê bînî ekonomîya welatî wextkilm tenê kerde rinde, labelê peynîya probleman nêameye.
Wezîrê fînansî yê DYA Tîmothy Geîthnerî rewşa xirab a ekonomîya welatê xo kerd eşkera. Geîthnerî hewteyo peyên kongreya Amerîka rê mektub rusnaye û va ke DYA zereyê krîzê deynan ê tewr girsî yê tarîxê xo der ê. Naye ra gore DYA no taw binê barê 14 trîlyonî Dollarî deyn der ê. Na hûmare ke tenêna berz bibo, bi mîlyonan karkerî karê xo kenê vîndî, faîz beno zêde û durimê fîrmayan kî beno xirabin.
Xeylê ekonomîstan ra gore tehluke deyngirewtiş der o. Eke deyngirewtişê DYA hende çapik şêro, rojê yena ke DYA axir besenêkenê deynê xo peyser biderê û kûnê duştê Yunanîstan ya kî Îrlanda. Eke nîya bibo, o krîzo newe krîzê fînansî yê serranê 2008-2009 ra giran beno. Ser o kî problem dayoxanê deynan der o. Înan ra zafine welat ê ke bi xo zaf pêt nîyê. Deynanê DYA ra 50 % Çîn, Japonya û Îngilîstan danê.
