Senatoyê DYA yew reformê Qanûnê Seveknayîşê Netewe red kerd. Nê reformî ra gore serekkomarê DYA besebikerdêne rasterast çekan birusnê pêşmergeyan, bê ke çekî Bexdad ser o şêrê.
Reformê qanûnî hetê senatoranê Jonî Ernst û Barbara Boxer ra pêşkêş bîbî. Hukmatê Obamayî duştê na game de bîyo. Înan ra gore ravêrdayîşê Bexdadî verba stratejîya DYA yo û Îraq parçe keno. Reformê qanûnî rê 60 rayî lazim bîyê, la tena 54 senatoran seba ci ray da. Nîya, bi 6 rayan reform red bîyo. Hewteyo verên Wezaretê Asayîşî û Wezaretê Karanê Teberî taybetî mektubî rusnabîyî senato ke seba reform ray nêdê.
Eke reformê qanûnî bivîyartêne, seba hîrê serran heqê serekkomarê DYA estbîyêne ke çekan birusno Herêma Federal a Kurdîstanî. Goreyê stratejîya DYA ya nikayine, kurdî duştê terorîstanê “Dewleta Îslamî” yan “DAÎŞ” de hemkarê muhîm ê, labelê DYA nêwazenê ke temamîya Îraqî bixeripîyo. Boyna, DYA terseno, eke kurdî çekan bigîrê, beno ke çekdarê şîîyî seba heyfgirewtiş ver bi personelê DYA hêriş bivirazê.
Xeylê wext o ke selahîyetdaranê kurdanê Başûrî da zanayene ke Bexdad çekanê ke cêno nêrusneno pêşmergeyan. No semed ra bi seyan pêşmergeyî canê xo danê ceng de. Heta ewro nêzdîyê 1.200 pêşmergeyan cengê duştê DAÎŞ de merdê, hîna 7.000 teneyî bîyê dirbetinî.
