Bîyê çar aşmî ke Kobanê de cengê duştê çeteyanê terorîstanê “Dewleta Îslamî” dewam kenê. Duştê çeteyan de cengdarê kurdî qehremankî xo ver danê. Rejîsoro kurd Zanyar Omranî (Rojhelat ra) di hewteyî cengdaranê YPG û YPJ de pîya bî û no dokumantarê 26 deqayan “Inside Kobanê” (Zereyê Kobanê de) qalê heyatê cengdaran keno.

Verê cû, Kobanê û 360 dewanê ci de dorê 400.000 însanî weşîya xo ramitêne. Nika tena da-4.000 kesî mendî, dorê 5.000 kî nêzdî de, Til Seîr de, manenê. Omranî qaçaxkî şî Kobanê û di hewteyî endamanê YPG reyde mend.

Dokumanter de ke bi kurdkî û cêrnuşteyê îngilizkî ame antene, tewir-tewir însanê Kobanê bi pêro veng û rengê xo yenê dîyene. Tede Farhad Şamî esto, yew xorto 28 serran ke eslê xo de rojnamegerîye wenda û nika berpirsîyarê medya yê Kobanê yo. Kobanê de Înternet birîya, şar pê tora telefonê destan ê Tirkîya dinya reyde têkilîye nanê ro. Nasrîne kêneka 22 serran a ke bi xo Kobanê ra ya. A pê kameraya xo cengdar û serebûtanê şaristanê wêrankerdeyî ancena ke dinya de pare bikero. Raywanîya xo de Omranî Avîndare nas kena, fermandara yewîyêka cinîyan ke bêters esnaya bombardumanî de roportaj kena…

Fîlm de rind yeno dîyene ke Kobanê çiqas wêran bîye. Bitaybetî rojhelatê şaristanî bîye xan-xirabe. Bomba, tank û topan ban, kuçe û wasitayî çin kerdî. Ceng ra ver, na taxe parçeyêde cande bîbî. Nika milet herinda milçik û vengê miletî de vengê çek û topan hesneno. Zafê banan rijîya, ê ke mendî, cengdaran dêsî lane kerdî. Nîya merdim bê ke bivejîyo teber, şikîno bananê quledekerdeyan ra bivîyaro cayêde bîn ê şaristanî.

Boyna, şarê Kobanê ke nêwaşt welatê xo terk bikero, ancîyayo. Doman, cinî û camêrd verê kamera de hîkayeya xo vanê. Zafêrîya sîvîlan cinîyê kokimî yan doman ê. Vanê, “Eke xortî mirenê, ez çayê merdene ra bitersî?” Sîvîlî peşewe bananê xo terk nêkenê, tena eke rewşêda lezgîne esta şonê teber. Çi mal û milk ke înan rê mendo, ê bi hemwelatîyanê xo de pare kenê.

Verê her çî, seyrkerdoxî vîneno ke şaristan de ruhê birayîye esto. Her kes her çî pare keno, rîyê miletî de huyayîş esto, çiman de hêvî. Nano ke pewjîno, bêpere beno vila. Werdo bîn kî qaçaxkî Vakur ra yeno rusnayene. Kam ke besekeno dest bido, dano kî. Tayê wasitayan tamîr kenê, tayê doktorîye kenê, tayê kî mermî û malzeme kirişnenê. Her kes yewbînî rê ardim keno. Vanê, no şaristanê yewîya kurdan o.