Hefteyo ke vêrd ra, Dîyarbekir de yew grûba newîye ameye ronayene: Morcelayê Kirmanckî. Grûbe hetê tayê gêncanê kirmancan (zazayan) ê ke Dîyarbekir de ciwîyenê, ra awan bîye. Morcelayê Kirmanckî mîyan de hema-hema her şaristanê welatî ra endamî estê û grûbe înîsîyatîfêdo sîvîl o. Amancê morcelayan o yo ke ê bi ziwanê kirmanckî çalakîyan organîze bikerê, kirmanckîhesan bîyarê têlewe û kirmanckî hîna zêde bidê dîyene komelî mîyan de. Goreyê vatena endamanê grûbe, eleqeyê na grûbe bi qet partî, sazgeh û dezgeyan çin o. Çîyo ke înan ano têlewe, kirmanckî ra heskerden a.
Grûba “Morcelayanê Kirmanckî” çalakîya xo ya tewr verêne 3. teşrîna verêna 2018î de bi şewêda şîîran Dîyarbekir de organîze kerde. Hîrê şaîranê hêcayan Bedrîye Topaçe, Denîz Gunduz û Omer Barasîyî mêmanan rê şîîrê xo wendî. Endamanê Grûba Vateyî ra M. Malmîsanij û Mehmûd Neşite zî mêmanan mîyan de bîyî. M. Malmîsanijî dawetê pêşkêşwanî ser o destpêke programî de xitabê mêmanan kerd, muhîmîya çalakîyanê nîyanênanê bi kirmanckî ra qal kerd û grûbe rê sipas kerd. Mabên û peynîya programî de tayê endaman kî bi enstrumananê gîtar û temburî tayê kilamê bi kirmanckî vatî. Grûbe peynîya programî de mêmanan rê eşkera kerd ke ê wazenê aşme de tewr tay reyê bi kirmanckî çalakîyê organîze bikerê. Na mîjdanî ra dima mêmanan keyfweşîya xo îfade kerde û şaîran reyde morcelayan rê kî sipas kerd.
