Dîyarbekir de Akademîya Ziwan û Edebîyatê Kurdkî abi

Dîyarbekir de Akademîya Ehmedê Xanî ya Ziwan û Edebîyatê Kurdkî roja 21.02.20012 saete 12.00 de bi merasîmêko erjaye ame akerdene. Temsîlkarê partî û sazîyanê kurdan ê ke Dîyarbekir de yê, beşdarê nê merasîmê akerdişî bîy. Şarê Dîyarbekirî zî nê akerdişî de paştî da merasimî. Bê nê sazî û kesan sere de serekê beladîyaya bajarê girdî Osman Baydemîr û serek û temsîlkarê beledîyê bînî beşdar bîy.

Cayê akademî mîyanê sûrî de lewê Camîya Girde de, vera Xanê Hesen Paşayî de yo.

Akerdiş de verê serekê akademî Heyrettîn Altunî qal kerd. Hayretînî qalkerdişê xo de bale ant ziwanî ser. Seba neteweyan rumetê ziwanî ser o fikrê xo ard ziwan û va: “Ma bitaybetî akerdişê na akademîya xo ewro kenê. Ewro ‘roja ziwanê dayîke’ yo. Seba ma kurdan na roje rojêka zaf muhîm a. Zor û zulmê dewlete ziwanê kurdan ser o dewam keno. Hema zî zaf çî bi ziwanê kurdkî qedexe yo. Ganî nê qedexeyî wedarîyê û bi ziwanê dayîke perwerde bêro kerdiş.”

Dima zî serekê beledîyaya bajarê birdî Osman Baydemîrî qal kerd. Baydemîrî va, “Mucadeleyêka seba ziwanî yena dayene do rojêke ser bikewo. Ganî ziwanê kurdkî bibo ziwanê perwerdeyî. Ziwanê kurdkî ganî dibistane ra dest pêbikero û hetanî unîversîte pê perwerde bêro kerdene. Na mesela ser o bazarî nêno kerdiş. No heq heqê heme şaranê cihanî yo .” Dima qal ard yewîtîya kurdan ser. Na babete ser o zî winî va: “Ganî kurdî vera heme heqanê xo bibê yew. Kam çi tewir fikirîyêno wa bifikirîyo, her kes cîya-cîya bifikirîyo zî rewşêka normal a. La kurdî seba armancê xo cîya bifikirîyê zî şikenê yewîtîya xo virazê.”

Dima serekê BDP yê Dîyarbekîrî Zubeyde Zumrute qal kerd. Endamê KCD Osman Ozçelîk û Zana Farqînî zî qal kerdê.

Akerdiş de pankartê kurmanckî û kirmanckî alaqîyê bî. La çi heyf kê yewî bi kirmanckî qal nêkerd.

DI/Mehmud Nêşite