Seba şikitişê bimbarekîya zîyara (jîyara) Tumê Xizirî dewa Pilemorîye Saldak de, şirketo tirk ê telekomunîkasyonî “Turkcell” Dêrsim de ame protesto kerdene. Mamekîye de ju (yew) grûba protestokerdoxan verê banê (bonê) Turkcellî de amey têlewe û bi sloganan polîtîkaya Turkcellî protesto kerd.
Serekê grûbe Haydar Çetînkayayî naye ser o va ke gerek Turkcell ozrê şarê Dêrsimî biwazo û no îstayon ke serê zîyare de ame viraştene, uca (uza) ra wedarîyo bêro berdene cayêde bîn. Dewijan ra gore no îstasyon îhlalkerdişê heqanê xo yê dînî yo. Çetînkayayî qisey kerd va: “Turkcellî par dewa Saldak, nêzdîyê Pirdê Surî de serê zîyara (jîyara) ke seba şarê Dêrsimî bimbarek o, uca de ju (yew) îstasyon viraşto. Uca darê ke bimbarek ê, amey veşnayene û hetê Turkcell ra bi dozeran amey wedardene. Na zîyare bimbarek a, labelê Turkcell bi na game îtîqadê ma rê bêrêzîye kerda.”
Qeseyanê bînan de bîyo eşkera ke zîyarê Dêrsimî her serre bi awbend, veşnayîşê birran, ocaxê mînaralî û nika kî hetê şirketanê jê (sey) Turkcell ra qestî yenê wedardene, benê xirabinî.
No pêserameyîş de xeylê dêrsimijî, parlementerê BDP yê Dêrsim Şerafettîn Halîs, deyrîbaz Erdogan Emîr û sereka Akedemîya Komelanê Elewîyan ê Dêrsimî Aysel Dogan beşdar bîy. Heta nika şirketê Turkcellî goş ro rexneyan nê da.
Peynîye de wekîl Şerafettîn Halîs qisey kerd, da zanayene ke “Ez na mesela parlemonto de ana zon (ziwan). Bi îtîqad û zîyaranê ma kay beno. AKP wazena ke îtîqadê ma maf kero, bikişo.”
