Dêrsim
Emser Dêrsim de seba newroze bi hezaran kesî amey têlewe û newroza 2011 pîya bimbarek kerd. Sîyasetkara kurde Leyla Zana no pêserameyîş de cayê xo girewt.
Meydanê Seyît Rizayî de adirêde girs hetê wezîrê beledîya û Leyla Zana ame wekerdene. Dormeyê adirî de de pîrî sema girewt û tepîya semedê newroze ra duayê kirmanckî kerdî.
Wekilê BDP yê Dêrsimî Şerafettîn Halîsî bi nameyê Mazlum Doganî ke 29 serran ra ver roja newroze de xo veşna, hurmetkarîya xo musnaye. Ey ra tepîya sîyasetkara kurde Leyla Zana qisey kerd: “Çiqas ke Amed zerrîya şarê kurdî yo, Dêrsim kî mezgê roştîya şarê kurdî yo. No semed ra ez newroza pêro hevalanê min ê ke nika zerre der ê û way û birayanê mi ke nika koyan der ê, bimbarek kena. Koyê berzî yê Dêrsimî mekanê Seyîd Riza, Bese û Zarîfe yo.”
Qiseykerdiş ra tepîya hunermend Xemgîn Bîrhat kilamî vatî.
Dîyabekir
Dîyarbekir de emser kî newroze bi beşdarîya da-ju (yew) mîlyon kesan ameye pîroz kerdene. Na newroze rê dîyarbekirijan ra teber kî xeylê kesê şaristananê bînan ê Kurdîstanî, Tirkîya û Ewropa ra ameybî.
Hûmara beşdaran par ra gore daha zêde bîye. Meydanê newroze pirr bî. Bi seyhezaran kesî na emser newroze de waştişê heqanê xo ardo ra zon (ziwan). Sîyasetkar Ahmet Turk, Osman Baydemîr û Aysel Tugluk qiseykerdişê xo sere ra bi peynîye bi kurdkî viraşt. Kanalê xeberan NTV ra Mete Çubuk no semed ra bi yaranîye keyepelê xo de nuşto ke “Reyna ma gerek ya kurdkî bimusîme ya kî çarnayox bîyarîme, çike jê (yew) rojnameger ma qiseykerdiş ra qet çîyê fehm nêkerd.”
Newroza emserêne musna ke şarê kurdan heta ke heqa xo girewt nêtexelîno û mucadeleyê xo dewam keno.
