Merkezê Kulturê Ciwanan ê beledîyaya Dêrsimî de sinifa ziwanê dayîke ameye ronayene. Selahîyetdaranê merkezî da zanayene ke “Duştê vîndîbîyayîş û xovîrrakerdişê ziwanê ma yê dayîke, kultur, tarîx û îtîqadê ma de, ma doş bi doş îme. No sebeb ra ma 21. gucige, roja ziwanê dayîke de, sinifa xo daye dest cikerdene.”
Sinifa ziwanê dayîke Banê Perwerdeyî yê Dîlek Serînî de ca gêna. Ewro kî salonê Mudirîya Kultur û Turîzmî de galaya fîlmê Vîlika Kowû saeta 18:00 de yena viraştene.
Merkezê Kulturê Ciwanan de kî gureyê koroyê doman û cinîyan bi kirmanckî dewam keno. Koroyê domanan yew album vet ke tede kilamê kirmanckî, kurmancî, tirkî, armenîkî û îngilzkî estê.
