Roja 10. kanûne de Dêrsim de “Mîtîngê 37-38” derheqê jenosîdê Dêrsimî de ame viraştene. No mîtîng bi hemkarîya 45 dezgehan ra ame ca û bi hezaran kesî tey beşdar bîy. Dêrsimijî esnaya pêserameyîşî de serekwezîrê Tirkîya Erdogan silayîye kerd ke verê heykelê Seyîd Rizayî de ozrê jenosîdê Dêrsimî biwazo.
Mîtîng de kî deyîrbazê kirmancî Ferhat Tunçî qisey kerd va ke jenosîdê Dêrsimî û dardekerdişê Seyîd Rizayî 74 serran ra ver sucêde zaf giran bî. Çike “dêrsimij jê (sey) vatena Seyîd Rizayî ewlad-î Kerbelayî bîy, bêgune bîy û bêxeta bîy.
Înanê ke fermanê merdişî yê Dêrsimî da, zalim ê û qetil ê ke çemê Mizurî verda gonî û gonaşîr da.
(…) Ewro şehîdê Kerbelayî yenê yad kerdene, labelê wexto ke qalê jenosîdê Dêrsimî beno, bêveng manenê û durust nîyê. Eke nêwazenê kî, ê no wehşet tesdîq kenê. Sîyaseto ke înan bi serran ma rê kerdo, ha no yo.
Ma kî jê (sey) şarî hende tarîxê xo rê wayîr nêvejîyayîme, ma para berpirsîyarîya xo ca nêarda. Ma besenêkerd ke pîl û seyîd, însanê ma ke qetl bîy, înan yad bikerê. Çîyêde en trajîk kî, guna ma a bîye ke ma ceribna ke înanê şarê ma qetl kerdo, no hard (erd) ser o meşrû bikerîme. Heya, şarê mayo dêrsimij, ma ro xo nênîme ke guna ma ya pêrune esta.”
Boyna, Ferhat Tunçî venga serekwezîr Recep Tayyîp Erdoganî da ke o verê heykelê Seyîd Rizayî de ozr biwazo. “Semedo ke 74 serran ra tepîya jenosîdê Dêrsimî ame înan vîr, ozrêde nêmciddî ê serekwezîrê nê welatî de esto. Kaşkêna kesî nê serekwezîrî rê îzeh bikerdêne ke ozrwaştişêde raşt goreyê lîteraturêde dinya senî beno.
Senî ke serra 1979 de şansolyeyê Almanya Wîlly Brandtî Polonya da verê heykelê jenosîdê yahudîyan de çok na ro ef waşt, gerek serekwezîr bêro verê heykelê Seyîd Rizayî de çok rono ef biwazo.”
Tunçî kî rexneyê partîya CHP kerd va “Parlamenterê na qeza Kamer Genç şono bêşerm û bêwijdan parlamento de vano ke ‘Nika çi îhtîyacê ozrî esto? Ma ma cigêrîme, nîyadîme, beno ke çîyêde seba ozrwaştene çin o’.”
Aye ra teber Tunçî peynîya qiseykerdişê xo de da zanayene ke gerek dêrsimijî tarîx, kultur û nasnameyê xo rê wayîr bivejîyê. “No tarîx tarîxê ma yo, dejê ma yo. Ma jê (sey) dêrsimijan dejê xo rê wayîr bivejîyîme. Gerek ma hîle û kayanê înan deşîfre bikerîme. (…) Ma ke 74 serran ra tepîya hîna bi eynî hîle û kayan ra xapenîme, guna ma kî tey esta. Şarê Dêrsimî bi onur û wijdanê xo meşte jê (sey) vizêrî do erja xo rê wayîr bivejîyê. Mi bawerîya xo pê naye vîndî nêkerd.”
