Dêrsim de 10.000 kirmancan duştê barajan de ke hetê dewleta Tirkîya ra yenê viraştene, protesto kerd.

Dorê 10.000 kesan bi sloganan jê (sey) “Baraj meviraze, rijnenîme sareyê (sereyê) to ser”, “Mizur azad biherikîyo” viraştişê awbendan protesto kerd. Planê dewleta Tirkîya ra gore Dêrsim de 20 barajî bêrê viraştene. Rojanê peyênan de eşkera bî ke awbendo ke Pilemurîye de ameyo plan kerdene, aşma adare de bêro viraştene. Naye ser o Meydanê Azadîye de dorê des hezarî kesî amey pêser û no plan rexne kerd. Uca (uza) ra bi pankartê “Dêrsim de awbendan nêwazenîme” hîrê kîlometreyî heta dewa Marçike lingan ra şîy. No mîtîng de ame dîyene ke afîşê ke destan ra hewa bîy, zêdêrî bi kirmanckî û kurmanckî ame nuştene.

Xeylê doman, cêncî û kokiman no protestokerdiş de cayê xo girewt, sloganî eştî û kerd eşkera ke Dêrsim de viraştişê awbendan nêverdanê. No pêserameyîs de wekîlê BDP yê Dêrsimî Şerafettîn Halîs, sereka beledîyaya Dêrsimî Edîbe Şahîn, deyîrbaz Ferhat Tunç û xeylê organîzatorî beşdar bîy.

Serê mîtîngdaran de helîkopterî çerixîyay, ê kî hetê dêrsimîjan ra amey rexne kerdene. Kokiman leweyê zîyaran (jîyaran) de dua kerd ke nê awbendî mêrê viraştene.

Nûmayîş de Şerafettîn Halîsî qisey kerd vat: “Na cografya de ewro şarê ma mîtîngo tewr girs ê dorûverî viraşt. Êndî dewlete û AKP şarê Dêrsimî jê (sey) ciddî bivîno. Nêke no şar bedelê xo çi beno bibo, xo şaneno verba viraştişê nê awbendan. Her kes bivîno ke ewro ju (yew) şaristan de ke tede 25.000 kesî ciwîyênê, înan ra 20.000 kesî amey no protesto.”

Nuşteyo peyênRektor Baydaş çi wazeno? – Mehmud Nêşite
Nuşteyo verênRomanê Denîz Gunduzî “Soro” – Îlhamî Sertkaya
DêrsimInfo
DêrsimInfo keyepelê kirmanckî yo ke serra 2010 de kewt fealîyet û xizmetê xo atraktîfkerdiş, raverberdiş, geşkerdiş û vilakerdişê kirmanckî (zazakî) de tarîf keno. Aye ra teber DêrsimInfoyî xo rê hedef kerd ke zaffikirîye û zafrengîya komelê kurdan temsîl bikero.

1 ŞÎROVE

CEWAB BIDE

Keremê xo ra şîroveyê xo binuse
Keremê xo ra nameyê xo binuse