Şaîro dêrsimij Denîz Doganî ra kitabê şîîran bi (ebe) nameyê “Perperik”î vejîya. Tede 43 şîîrê Doganî estê, kitab weşanxaneyê Tîjî de çap bî.
Denîz Dogan kitabê xo ser o nîya vano: “Ez kî no zon (ziwan) de rindekîya hard (erd) û asmên, teyr û tur, gul û sosinî şima rê bi kilaman ano ra zon (ziwan). Perperik ko û deştan ra her gul û sosin tahm keno. Boya gul û sosinan ra zêde na dinya de kes nêzaneno, nas nêkeno.” Doganî şîîrê xo serra 2000 ra heta serra 2010 arê kerdo. Mewzûyê şîîran heskerdiş, Dêrsim, xeribîye, bêkesîye û hetta tarîxê Dêrsimî, mavajîmê Seyîd Riza û Alîşêr o.
Denîz Dogan serra 1976 de Dêrsim de dewa Sogayîge de ameyo dinya. Seba ke serra 1994 de dewa înan ame tal kerdene, înan bar kerd şî ju (yew) dewa nêzdîyê Mamekîye. Denîz Dogan serra 1995 ra bi nat weşîya xo Almanya de rameno.
Şîîra “Mi her çî welat de caverdo” ra parçeyek:
Mi her cî welat de caverdo.
Waştîya xo ra zof has kerdêne
Ci rê her son de kilamî wendêne
Lawikî kerdêne ju
Vengê ma hata sodir
astereyî reqesnêne
Ma jumînî ra
dewa xo ra
weşîya xo ra
qulê xo ra
zof has kerdêne
____
Dogan, Denîz, Perperik, Vejîyayîşê Tîjî, 2010, 77 rîpelî, ISBN 975 8277 37 7
