Sermayegozarê Çînî û fîrmayê çînijî no taw Ewropa de envestmananê xo zêdnenê. Bitaybetî sektoranê tomofîl, enerjîya newîye û fînansî de kapîtalê çînijan zaf o. Naye ra kî dot erazî û apartmanî bala sermayegozaranê çînijan ancenê (oncenê). Sermayegozarîyanê Çînî 30% nê welatanê Ewropa der ê: Yunanîstan, Spanya, Portugal û Îtalya. Çîn krîzanê fînansî yê nê welatan ra kar keno û ban (bon), şîrket û erazîyanê nê welatan herîneno.

No dem kasayê Çînî de hîna 3 trîlyon Dollarî ra zêde pereyî estê. Markayê ewropayijî yê namdarî hêdî-hêdî hetê Çînî ra yenê herînayene: pêro Saab seba 300 mîlyon Dollarî, pêro Volvo (Swêd) seba 1,5 bîlyon Dollarî, 10% yê Rîo Tînto (Brazîl) seba 10 bîlyon Dollarî, 10% yê para Addaxî (Swîs), pêro Elkern (Norweç) seba 8 bîlyon Dollarî, 50% yê InterGenî (Holanda) seba 2 bîlyon Dollarî, 600 mîlyon Dollar seba 20%  yê NH Hoteles (Spanya), 14 mîlyon Dollarî seba markaya saetan yê Swîsî Eterna, 630 mîlyon Dollarî seba pêro Medion (Almanya), 500 mîlyon Dollarî seba viraştoxê tomofîlan Hummer (DYA).

Goreyê xebera Financial Timesî kî Îtalya ke nika binê deynanê 1.900 bîlyon Euroyî de nalena, bi hewteyan temsîlkaranê fonanê çînijan de yena têlewe ke sermayegozarê Çînî şîrketanê Îtalya de envestî bikerê. Yewîya Ewropa (YE) ke krîzê ekonomî yê welatanê xo de meşgul a, hêvî kena ke welatê Çînî bi îxtîyatê xo yê dovizî yê 3.200 bîlyon Dollarî ardimê welatanê Ewropa bikero. Texmîn beno ke Çîn xeylê tahvîlanê dewlet ê welatanê YE biherîno û nîya krîzê nê welatan kêmî bikero. Heta nika tam eşkera nîyo ke Çîn çend tahvîlê YE girewtî. Vanê, Îtalya de dorê 4% yo, yanî 76 bîlyon Euroyî. Spanya, Portugal û Yunanîstan de nê reqemî kî bi bîlyonan ê. Labelê borsayê nê welatan duştê envestmananê Çînî de hîna kûnê.

Heto bîn ra kî Çîn, seba ke îxtîyatê xo yê Dollarî kêmî bikero, wazena ke Ewropa de hîna zêde şîrketan de envestî bikero û nîya kapîtalê xo neql bikero. Mesela, no taw Bankayê Şarî yê Çînî Almanya de parêda girs a fîrmayê reasuransî Munich Re. herînaye, aşma tebaxe de kî şîrketê komputeran Medîon hetê şîrketê çînijî Lenovoyî ra ame herînayene.

Pêro pîya sermayegozarîyê Çînî yê 5 serranê peyênan dorê 218 bîlyon Dollarî bîy. 34,8 bîlyonî şîy Ewropa, 28 bîlyonî bi DYA û 61 bîlyonî bi Kanada û Amerîkaya Başûrî.

CEWAB BIDE

Keremê xo ra şîroveyê xo binuse
Keremê xo ra nameyê xo binuse