CHP ra: “Şaro tirk û kurd têduşt nîyê”

Wekîla CHP ya nasyonalîste parlamento de qisey kerd, dima wekîlê kurdî yê Semsûr partî ra îstîfa kerd.

Yew munaqeşa parlamentoyê Tirkîya de parlamentera partîya CHP ya Îzmîrî Birgul Ayman Guler qisey kerd va ke “Şima besenêkenê mi rê neteweperwerîya kurde sey ‘averperwerîye’ û ‘xoserîperwerîye’ biroşê. Şima besenêkenê şaro tirk û şaro kurd seypê, sey hemerj bidê musnayene.” Nê qisayan hetê sirayanê CHP û partîya muhafezekara tirkpereste MHP ra çepikî dîy.

Dewamê qiseykerdişê xo de Guler nîya va: “AKP û BDP hemkarîye kenê. Tirkîya de mesela kurdan çin a. Şima no problem Tirkîya de kerd mesela tirkan. Naye ra tepîya ma seveknayîş der îme, naye ra tepîya ma seba heqê mudafa yê meşrû hêriş der îme.”

Dima, mîyanê parlementeranê BDP, AKP, CHP û MHP de dîyalogê vengberzî qewimîyay. Hewteyo verên kî serekwezîrê Tirkîya Tayyîp Erdoganî ardîbî ziwan de Tirkîya de mesela kurdan çin a.

Sebebê nê qisayanê Gulerî ra parlamenterê Semsûrî yê CHP Salîh Firat partîya xo ra îstîfa kerd. Xeberanê neweyan ra gore semedê nê îstîfa ra zereyê CHP girîno. Firatî vilaweka xo ya îstîfa de nîya nuşt: “Rîyê zulmî ra ke ez tede vînena, ez CHP ra îstîfa kena.” Salîh Firatî telefonê xo ca da, îstîfaya tek cumle pê faks rusna merkezê pêroyî. Dormeyê Firatî ra ame heşnayene ke Firatî va ke o besenêkeno bi partîya ke nîya fikirîna, tede bimano. Hîna CHP ceribnena ke Firat îstîfaya xo peyser bicêro.

Bi îstîfaya Firatî ra sandalîyê CHP yê parlamentoyî bîyê kêmî bi 134, hûmara xoseran kî bîya berz bi 7 sandalîyan. Hîrê wekîlê kurdî Kemal Kiliçdaroglu, Huseyîn Aygun û Kamer Genç hîna CHP de manenê.