Şaro kurd nê rojanê peyênan de seba ke mekteban de bi ziwanê dayîke perwerde bibo çalekîyanê balkêşan virazeno. Nê çalekîyanê peyênan ra zî fehm beno ke şaro kurd êdî fek heqê ziwanê xo ra veranêdano. No boykotê mekteban de şaro kurd pêro pîya werişt ser lingan û piştî da nê boykotî. Ez vana qey şaro kurd reya verên a ke bi înahawa piştî dano yewbînan. Eke wina bo, dewlete ya no heq ra vana e ya zî bin ra şina.

Her çiqas ke nê çalekîyan ewro bivirazîyê zî, la bezreyê înan (nê çalekîyan) rew ra yo ke ameyo eştiş. Nê çend serrî yê ke Kurdîstanê vakurî de şarê kurdî seba ke bi ziwanê dayîka xo perwerde bibo, seba ke bi ziwanê dayîka xo bieşko biwano û binuso dest bi xebate kerdo. Tayê sazan rew ra yo ke zaf cayan de sey Dîyarbekir, Batman, Wan û cayanê bînan de kursê ziwanî akerdê û hema zî dewamê akerdişê nê kursan kenê. Her ke şino zî hûmara nê kursan zêdîyena.

Montarê hîrê-çar serran de hema-hema heme beledîyayanê Dîyarbekirî nê kursan akerdê. Kurdî-Derê Dîyarbekirî rew ra yo ke dest bi nê kursan kerdo û roje bi roje zî wendekarê nê kursan zêdîyenê.

La çi heyf ke nê kursî zafêrî bi dîyalekta kurmanckî abenê. Eke wina şêro, dîyalekta kirdkî do tepay bimano. Xora ma zî zanê ke kirdkî (kirmanckî) gorebê dîyalekta kurmanckî zaf ropey (tepîya) menda.

Ez ke zana binê banê KURDÎ-DERî de reyêk ya di reyî seba dîyalekta kirdkî kursî abîyê. Labelê mîyanê nê çar-panc serran de seba dîyalekta kurmanckî en tay 30-40 kursî abîyê.

Bê KURDÎ-DERî par nê wextan buroyê Vateyî yê Dîyarbekirî de seba dîyalekta kirdkî buroyê xo de yew dersxane hedre kerd û destpêk de 22 wendekaran rê yew kursê kirdkî akerd û hîrê aşmî dewam kerdibi. Gorebê vatişan, no buro do emser zî goreyê şertanê xo kursan akero.

Reya verên a ke Çewlîg de zî nê kursan ra kursêko kirdkî abeno. No kurs bi hemkarîya VATE û BÎN-DERî semedê dîyalekta kirdkî  (kirmanckî) abi. Kurs roja 26ê aşma êlule de bi heştês wendekaran dest pêkerd. No kurs do çar hewteyî dewam bikero. Mamostayê nê kursî do Buroyê Vateyî yê Dîyarbekirî ra her hewte roja yewşeme şêrê Çewlîg û Çewlîg de bînaya BÎN-DERî de çar saetî dersa ziwanî yê dîyalekta kirdkî bidî.

Mehmud Nêşite

1 ŞÎROVE

  1. Xizmete BIN-DERi welatheskerdena zaf memnun bime sima wes u varbe tesekur sema na xizmete rumet silam u hurmet.

    Mirza

CEWAB BIDE

Keremê xo ra şîroveyê xo binuse
Keremê xo ra nameyê xo binuse