Tarîxê Komara Tirkîya de çerkezî ju (yew) aşme ra tepîya reya dîyine vejîyay meydan û semedê waştişê heqanê xo amey têlewe. Na rey 2.000 ra zêde çerkezî Îstanbul de amey pêser.
Protestokerdoxî bitaybetî perwerde, televîzyon û radyo bi zonê (ziwanê) dayîke wazenê. Aye ra kî dot vurnayîşê qanûnê bingeyî yê 12. êlule, wedaritişê qanûnê hemwelatîye û yê paragrafê 41. yê qanûnê bingeyî ke perwerdeyê bi zonê (ziwanê) dayîke keno qedexe, amey waştene.
No mîtîng de pankartê jê (sey) “Zonê (Ziwanê) dayîke de perwerde wazenîme”, “Zonê (Ziwanê) dayîke şeref o, şerefê xo rê wayîr bivejîyê”, “Anatolî hîna çend mezela zonan (ziwanan) bo?”, “Zonê (Ziwanê) dayîke şeref o, dana pêro, seveknena” amey hewa nayene. Çerkezan kincê xoyê tradîsyonalî kerd pay û alayê Adîyge, Abhazya, Osetya û Çeçenîstan eştî hewa.
No pêserameyîş de qiseykerdoxê Înîsîyatîfê Heqanê Çerkezan Meretuko Kenan Kaplanî ard zon (ziwan) ke înkar, surgun, îxanet, teberkerdiş û asîmîlasyon no sîstem de ronayîşê Komara Tirkîya ra bi nat, yanî 88 serrî, dewam kenê bîyê ju (yew) galerîya gune. Ferqê Împeratorîya Osmanîyan û yê Tirkîya o yo ke Tirkîya de şarî yenê înkar kerdene. Tirkan waştêne ke şarêde newe bivirazê. “Labelê no plan nêgureya. Des serrî yo ke sîstemê înkar û teda rijîya.” Kaplanî boyna va ke problemo tewr girs asîmîlasyonê dewlet o. Kaplanî no esna de peynîya asîmîlasyonî û serbestîya nasname û zonê (ziwanê) çerkezan waşt.
Qiseykerdişê Kaplanî tepîya ancîya (onca) bi çerkezkî ame wendene. Dima, deyîrbaza namdare Kube Nurhan Fîdan mîtîng de sahne girewte û kilamê çekerzî vatî.
Cerkezure bravo, endi her mileto ke hata nika biyo inkarkerdene, heqe u ziwane xo vazene. Pore partiye tirk je akp, chp ney qebul nikene. Bi cekan nibeno, bi siyasi nibeno, bi asimilasyon nibeno… Birayene vayene eke niyaro no cutir beno?