Ju (yew) wendekaro cênc ê Unîversîteya Uşakî bi nameyê Huseyîn Arik rastê hêrişê tirkanê radîkalan bîyo. Seba ke Arikî nêwaşt qendilê Mewlidî, yanî welidîyayîşê pêxamberê muslumanan Muhammed bimbarek bikero, hetê dîndaranê radîkalanê tirkan ra ame hêriş kerdene.

Şaristanê Uşakî de qendilê Mewlidî her serre ju (yew) xeyme de yeno pîroz kerdene. Emser wendekar Huseyîn Arik ke verê nê xeymeyî de vîyart, silayîye girewte ke bêro zereyê xeymeyî û muslumanan reyde qendil bimbarek bikero. Seba ke Arik elewî yo, sipas kerd, va ke o nêwazeno bikuyo zere. No cewab ser o Huseyîn Arik rastê hêrişî bî. Arikî ra gore hêrişkaran waşt ke ey lînç bikerê, ro ey heqeret kerd va ke “O kafir o, bîyayîşê pêxamberî bimbarek nêkeno. Pêro dê!”

Arikî no serebût ser o va, “Nê faşîştî mi unîversîte ra nas kenê. Ez ke verê nê xeymeyî ra vêrd ra, nînan raya mi birnaye û mi ra va ke ez bêrî zere ma roja pêxamberî bimbarek bikerîme. Mi ke va ez elewî ya, înan mi ra zirçay va ke ‘Komîsto, def be şo Rûsya’ û hêrişê mi kerd. Dima, venga derûdorî da va ‘No kafir heqeret ro pêxameberê ma kerd’. Ez kî uca (uza) ra şîya bîya dûrî. Wexto ke nişta ro otobuse, uca (uza) de kî mi ra va ke ‘Ti ke musluman nîya, çikê to esto welatê muslumanan de?'”

Arik no serebût ano dadgeh û Komela Heqanê Merdiman (Mordeman).