Cêncê Kurdî: Na Artêşe rê eskerênî nêkenîme

60 cêncê kurdan xizmeto binê silehan ê ordîya Tirkîya red kenê. Ê cencan va ke artêşa ke şarê kurdan înkar û çin kena, eskerîya înan heq nêkeno.

300 cêncî paytextê Tirkîya Anqara de amey têlewe û kerd eşkera ke artêşa tirke de serranê peyênan de xeylê cêncê kurdî amey kiştene. No mîtîng de 60 cêncan kî da zanayene ke eskerênîye red kenê. Pêserameyîş de pankartê jê (sey) “Artêş rê ke birr veşnena, ney”, “Wijdanê şarî artêşe red keno”, “Artêşe ney, gerîllayê şarê xo yîme”, “Qetilê Serzanî rê xizmet nêkenîme” eştî hewa.

Redkerdoxan ra Ahmet Demîrsoyî va ke tarîxo ke hetê dewlete ra ameyo nuştene, qebul nêkenê, çike no nuştiş de hurendîya (herinda) qeleme de çekan, hurendîya (herinda) murekebî de gonî ameyo xebitnayene. Demîrsoy qiseykerdişê xo dewam kerd: “Tirkîya, Îran, Îraq û Sûrîya sazbîyayîşê xo ra bi nat henî zanayêne ke her ca yê înan o. Dewleta mîlîtarîste na xeletîye çarnaye ju (yew) tabu. Kokê îdeolojîya înan de yewkerdiş (jukerdiş), qirkerdiş û îtaatgirewtiş esto. Nika kî wazenê ke ma kî bibîme eskerê înan bibime û duştê şarê xo de bivejîme. Artêşe de ke eskeranê xoyê kurdan kişena, se bikerîme, zereyê artêşe de ke ma înkar kena, tede se bikerîme? Seba redkerdişê eskerênîye xeylê semedî estê. labelê seba xizmetkerdişê eskerênîye ju (yew) sebeb çin o.”