Peynîya şampîyonîya dinya de hevala kalevanê ekîbê Spanya Îker Casîllasî Sara Carbonero waşt ke ey de yew (ju) roportaj bivirazo. Her maç ra tepîya hevala ey ke yew kanalê televîzyonî yê Spanya de sey (jê) spîkera futbolî gureyena, yena leweyê Îker Casîllasî û persanê xo pers kena.
Cewabê di-hîrê persan Îker Casîllasî rind da, perso peyên de Sara Carbonero ey ra pers kerd ke seba estareyêde futbolî şampîyonîya dinya ra çi tenêna qîymetin o. No pers ser o Casîllasî raver besenêkerd ke çîyê vajo û xafil de hevala xo ante (onte) xo het û bi tewirêde rindek lew na pira roportaj qedêna. Spanya ra yew mîlyonî qayîtkerdoxan ra zêde no paç cande dî.
Nika vîdeoyê paçê Casîllasî Înternet de bî namdar. Bi mîyonan însanan qayîtê ê vîdeoyî kerd.
Casîllasî paç ra ver va ke, “Hevalanê ke mi rê destek da, înan rê nika ra sipas kena. May û pîyê mi, birayê mi, pêrune rê.” Destekdayîşê Casîllasî zaf muhîm bî, çike virênîyê turnuva de ey tayê xeletîyî kerdîbî û no semed ra zaf ameybî rexnekerdene.
