Dêrsim Mamekîye de şarî hêrişê rêxistina terorîste “Dewleta Îslamî” (DÎ) şaristanê Kurdîstanê Rojawanî Kobanê ser o, protesto kerd. Nûmayîş Sûka Binharde ra heta Pirdê Mamekîye şî.
Binê pankartê “Kobanê onurê însanî yo, xo ver dana, bêveng memane” protestokerdoxan, hemserekê beledîya Mehmet Alî Bul û temsîlkarê partîyanê sîyasîyan tede, dest bi nûmayîşê xo kerd. Protestokerdoxî ver bi Pirdê Mamekîye şîy, trafîk ame cadayene. Dima çalakîya roniştişî ya 5 deqayan ameye kerdene. Bulî qiseykerdişê xo de da zanayene ke Kobanê bena şoreşê na seserre û ke hukmatê AKP dest dano çeteyanê Kobanê. “Zulmo ke Kobanê 23 rojî vînena, şarê Dêrsimî 1938 de kî dî. Senî ke ma vanîme Dêrsim rê sefer beno zafer nêbeno, Kobanê û Rojawan rê kî sefer beno la caran zafer nêbeno.”
Qiseykerdiş ra tepîya protestokerdoxî bi slogan û çepikan peyser şî merkezê Mamekîye.
