Roşnvîr û sosyologê Tirkîya Îsmaîl Beşîkçî rojnameyê tirkî Cumhurîyetî de qisey kerd û fikrê xo derheqê mesela kurdan de da zanayene.
Îsmaîl Beşîkçî waştişê serekê PKK Abdullah Ocalanî ke o bi xo bibo endamê Komîsyonê Însananê Aqilmendan, qebul nêkeno. No komîsyon çareserkerdişê mesela kurdan bi hemkarîya dewlete de do eleqedar bo. Fikrê Beşîkçî ra gore helkerdişê mesela kurdan bi Ocalanî ra ney, la gerek pê BDP bibo. Beşîkçî: “Beno ke virarefiştişê Ocalanî bi slogananê înkarker, asîmîlasyonkar û kolonyalîstan ê fehmê sentezê tirk-îslamî dewlete keno rehete, labelê kurdan rê ne heq ne kî azadîye ano. Biratîya îslamî sloganê meşgulkerdiş û xapênayîşê kurdan o.”
Derheqê rolê serekwezîrê Tirkîya Recep Tayyîp Erdoganî de Beşîkçî naye va: “Heq û azadîya ke serekwezîr seba Fîlîstîn wazeno, gerek naye seba kurdan kî biwazo. Eke nîya nêfikirîno, gerek bêro pers kerdene.”
Boyna, Beşîkçî ke ci ra mamostayo çeqer vanê, roportajê xo de da zanayene ke helkerdişê mesela kurdan tena çekanveradayîş nîyo. “Çayê gonî rişîna? Semedê naye yo bingeyên o yo ke kurdî wayîrê bîyayîşê komelê kurdî nîyê. (…) Gerekî kurdî tewr tay federasyon biseveknê. (…) Rojhelato Mîyanên de kurdî wayîrê nusufêde zaf girs ê, tewr tay 40 mîlyonî. Dewleta xosere rojeve der a. (…)
Çîyo ke serekwezîr Erdogan û kurdî derheqê aştîye de pawenê, cîya-cîya yê. Serekwezîr aştîye sey peyserşîyayîşê gerîllayan fehm keno. Serekwezîrî ra gore yewna problem çin o. Kurdî, heto bîn de, heq û azadîya kurdan wazenê. ”
Peynîya roportajî de Beşîkçî qal ardo fikrê sentezê tirk-îslamî û kurdan ser o. Abdullah Ocalanî newroza Amedî de sloganê biratîya îslamî û kurdan eştî, Îsmaîl Beşîkçî no rexne kerd. “Sloganê sey ‘Biratîya îslamî ya hezar serran’, ‘Çanakkale de ma pîya pêro da’, ‘Ma komare doş bi doş pîya saz kerde’, ‘Elewî-sunî îslam bira yê’, ‘Yewîya îslamî’, ‘Mîsakî Mîllî’ înkarkerdox, asîmîlasyonkar, nîjadperest, kolonyalîst û yê dewleta Tirkîya yê. Nê sloganê fehmê sentezê tirk-îslamî yê. (…) ‘Biratîya îslamî’ sloganê meşgulkerdiş û xapênayîşê kurdan o. Îttîhat û Teraqqî ra bi nat serdestanê tirkan nê sloganî tim duştê kurdan de xebitnayêne. (…) Labelê êdî mumkîn nîyo ke bêro ca. Hetê sîyasetî ra bê têduştîye biratîye nêbena. ‘Biratîya îslamî’ hertim pê kurdan xapitî.”
Beşîkçî kî duştê “mandelakerdişê” Ocalanî de vindet, va ke “Wexto ke Mandela hepisxane de bî, vatîbî ke ê şêrê Konseyê Netewe yê Afrîka de bêrê têlewe. Ganî Ocalan zî BDP nîşan bido.”
