Bengî Yildiz: Pê ma xapnenê

0
250

No hewte şaristananê Kurdîstanî Wan, Dîyarbekir û Colêmerg de protestoyê girsî amey viraştene. Nê pêserameyîşan de ame waştene ke êndî (êdî) zonê (ziwanê) kurdkî bêro musnayene û perwerdeyo resmî bi kurdkî estbo.

Semedê roja 21. gucige ra ke hetê UNESCO ra jê (sey) “Roja Zonê (Ziwanê) Dayîke” ameye îlan kerdene, xeylê kurdî meydanan de bîy. Mîtîngê Wanî de wekilê BDPyê Bengî Yildizî qiseykerdişê xo de temayanê sîstemê dewleta tirke ser o vindet. Ey ra gore dewlete hîna wazena ke şarê kurdî bixapno. “Virênî de Îsmet û Mustafa, ewro kî Tayyîp û Fethullah pê ma xapnenê.” Meydanê mîtîngî de xeylê resimê Albert Eînsteînî amey hewa nayene.

No kombîyayîş de hema-hema pêro qiseykerdişî bi kurdkî bîy. Bengî kî bi kurdkî qisey kerd û nîya dewam kerd: “Kurdîstan bîyo çar parçeyî. No sucê ma nîyo, yê hêzanê emperyalîstan o. Kesî heta nika besenêkerd ke welatê ma bicêro binê destê xo. Tîya (îta) de walî, qaymeqam ya kî polîs ju (yew) çekuya kurdkî nêzanenê. Na kolonyalîstî ya, nê êndî besenêkenê ke sermîyanîya şarî bikerê. Pê kiştiş înan besenêkerd şima biqedênê. Camî, mekteb, qereqolan de besenêkerd şima asîmîle bikerê. Ma pêro besenêkenîme ke şêrîme koyan, bikuyîme zindanan. Labelê mecbur nîyîme ke pê asîmîlasyonê înan qebul bikerîme.”

A roje domanî kî jê (sey) nîşanê protestoyî mekteb nêşîy û mektebê ke bi kurdkî nîyê, ê protesto kerdî.