Serekê şaredarîya Dîyarbekirî yo kan û parlamenterê HDP yo kan Osman Baydemîro ke no taw Londra de weşîya xo rameno, 26. gulane 2020 de be rojnameyê Telgraf Aktuel derheqê Tirkîya û sîyasetê kurdan de qesey kerd. Naye de Baydemîrî va ke dewleta Tirkîya dewleta kurdan nîya. Qeseyê Baydemîrî nê yê:

Êndî test bîyo ke no rejîm be erjanê demokrasî nêno vurnayene û nêwazeno bivurîyo. Duştê ma de yew rejîmo ke bêro vurnayene, çin o. Duştê ma de rejîmo ke ganî birijîyo û enqazan mîyan de bibo vîndo û bixeneqîyo, esto. No rejîm demokratîze nêbeno, na dewlete komara demokratîke nêbena. Coka ez vana ke ganî ma nika reyna muhasebeyê na seserre bikerîme. Çi heyf o ke na dewlete dewleta ma nîya, no parlamento parlamentoyê ma nîyo. Ganî ma be vengo berz naye vajîme. Na dewlete Dîyarbekir de meşrûîyetê xo kerdo vîndî, çike sandiqa xo darîyaya we. Na dewlete uca dewletêda îşgalî ya, dewletêda kolonyalîst a.”

na dewlete komara demokratîke nêbena

Baydemîrî dewamê roportajê xo de giranî da ser ke demokratîzekerdişê Tirkîya nafîle yo û ganî kurdî neslanê ameyoxan biseveknê. Baydemîrî va “Se serrî yo ke şarê kurdan va ‘Parlamentoyê Miletê Tirkan o Girs bibo parlamentoyê kurdan. Komara Tirkîya kî bibo dewleta kurdan. Na dewlete kî bibo yê ma’. Na dewlete vana ‘Ney!’. Vana ‘ez şima asîmîle kena.’ Ganî ma na raştîye sey neqişêk biderzîme dinyaya zîhnî û zerrî yê şarê ma ro: na dewlete û pêro mekanîzmayê na dewlete êndî dewleta kurdan, ya kî dewleta elewîyan ûêb. nîya. A roje yena, la ma hema seba a roje amade nîyîme. Çike ma demokratîzekerdişê na dewlete dima ra yîme. Nê pêro enerjî, pêro efor, pêro qurbanan ma seba çîyo ke nêbeno, xerc kenîme.”

Mi rê çi Îstanbulê şima, Anqaraya şima, Îzmîrê şima ra?!

Boyna, Baydemîrî bale ante ser ke lejê kemalîst û îslamîstan o ke parlamentoyê tirkan de ca cêno, eynê kurdan de nîyo. “Ganî ma naye eşkera-eşkera vajîme: cografyaya ma esta, nameyê ci kî Kurdîstan o. Ez yew şar o. Mi rê çi lejê faşîstanê kemalîstan, lejê faşîstanê îslamîstan ra? Wa şêrê cehenem! Hur demêna şêrê cehenem. Mi rê çi Îstanbulê şima, Anqaraya şima, Îzmîrê şima ra?! Ganî ma eşkera na dewlete ra vajîme ke ‘Na dewlete dewleta mi nîya’. Ez nêvana ke qewetê ma ci rê bes o. Ez zanena ke qewetê ma bes nîyo. La eke qewetê ma bes nîyo, qewetê ma xo rê bes o. Ma parçeyê kayê înan nêbenîme. Wext ameyo ke ma zemînê cîranbîyayîşê Tirkîya virazîme û game be game, hêdî-hêdî dêsê xo bimûnîme. Wext wextê hegemonyaya îdeolojîke nîya, wext wextê estbîyayîşê nikayinî yo. Wext wextê estbîyayîşê miletê ma yo. Miletê ma nika Rojawan, Vakur û hetta Başûr de, çar parçeyanê Kurdîstanî de binê tehlukeyê vîndîbîyayîşî der o. Çike ma reyna rîskê ciwîyayîşê 1915î de têrî yîme.

Pêro îdeolojîyî bibê qurbanê îttîfaqê kurdan ê neteweyî. Pêro netîceyê partîyan ê sîyasî û hegemonîkî hezar rey bibê qurbanê îttîfaqê kurdan ê neteweyî. Partîyê sîyayî tena wasîta yê, wasîtayê ke nê şarî, na netewe zilm û esaret ra raxelisnê. Armanc çik o? Armanc o yo ke nê şarî biresnîme azadîye. O wext ganî ma wasîtayan verê armancan de ronênîme.”

CEWAB BIDE

Keremê xo ra şîroveyê xo binuse
Keremê xo ra nameyê xo binuse