Serekê beledîyaya Dîyarbekirî Osman Baydemîrî derheqê tehdîd û tersnayîşê medyaya tirke de qisey kerd. Baydemîrî da zanayene ke çapemenîya tirke û partîya hukmdare AKP rojanê peyênan de bi xeber û vilawekan ey de ju (yew) kay virazenê. Baydemîrî ra gore hukmat wazeno ke na stratejî ra înanê ke duştê dewlete der ê, bicêro xo dest. Cewabê na stratejî Baydemîrî nîya da: “Ez teslîm nêbena.”
Bi kilmekî tayê parçeyê qiseykerdişê Baydemîrî: “Ma demêde zor û zehmetin de ciwînîme. (…) Seba ke merdim (mordem) nê deman ra pêt û pak bivejîyo, qehremanîye lazim a. Çaxanê kaotîkan de gerek bitaybetî hereketê medya bibo çilaya raya aştîya komelkî. Labelê ma ke tey nîyadîme, ma vînenîme ke rolê medya rolêde bîn o. (…) Hukmat her keso ke ey bîat nêkeno, ceza keno. (…) Stratejîya înan nîya r’ a.
Ma ewro qayîtê manşetanê rojnameyanê jê (sey) Zaman, Yeni Şafak, Bugün ûêb. bikerîme, ê ceribnenê ke mi ser o operasyonanê KCK meşrû bimusê. Beno ke heta ewro hetê dozgeranê komare ra hezar tehqîqatî amey viraştene, ez bi seyan rey muhakeme bîya. O wext kî ez serekê şaredarî yo weçînite bîya. Xeylê hevalê min ê serekê beledîya ya kî endamê parlamentoyî no taw tewqîfkerde yê. (…) Çîyo ke şima kenê, polîtîkaya dirîyî ya. Ez hêvîdar a ke na dirîyîye do kitabanê dersan de jê (sey) nimûneyêde xirabin ca bicêro.
Ê kî duştê mi de tehdîd, kar- û wezîferaeştiş ra nêtersenê. Mabênê di serran de mi 6 rey agahdarnameyê resmî yê suîkastî girewtî. Ê rastiken ceribnenê ke hîsêde nîyanên bivirazê ke merdim (mordem) her peşewe rakewtiş ra ver xo ra biperso ‘Ma mi emşo çê (keye) ra benê?’, şodirane raya beledîya de kî xo xo de bifikirîyo ‘Gelo ez ewro rastê suîkastî bena?’. Nîya plan beno ke merdim (mordem) teslîm bo. Ez teslîm nêbena. (…) Ez Heq û şarê xo ver de sond wena ke zulm kamî ra yeno wa bêro, ez zaliman rê teslîm nêbena. Ez caran poştîya xo şar, azadîye, têduştîye, edalet, onur û pîyaciwîyayîş ra ranêcêrena. Her şertan de ez do seveknayoxê şarê xo bibî.
(…) ‘Xebera servîsî’ ke medyaya AKP de ca cêna, ju (yew) qeleme ra vejîyaya. Binê metnêde polîsî de her rojnameyî îmzaya muxabîranê xo xebitnaya. (…) Ez venga ê rojnameyanê corênan ke ê manşetan viraştî, dana: meverdê ke wijdanê şima qilêrin bo ya kî bêro qilêrin kerdene. Qilêrin mebê, mêrê qilêrin kerdene.”
