Serekê Herêma Federal a Kurdîstanî Mesûd Barzanî roportajê xo bi kanalê televîzyonî yê DYA PBS de da zanayene cengê duştê çeteyanê “Dewleta Îslamî” (DÎ) de planê xoserîye tenêna taloq kerd, labelê hedef nêvurîya.

Roportajo ke babetanê Mûsil û pêşmergeyanê pêgirewteyan ser o vindet, Barzanî venga komelê mîyanneteweyî da ke hîna zaf û hîna rind çekan birusnê pêşmergeyan. Aye ra teber Barzanî da zanayene ke, eke Îran bikewo lejê duştê DÎ, problemêk kî nîyo.

“XOserîye taloq bîye, la hedef eynî yo”

Derheqê mesela xoserîya Herêma Kurdîstanî de, Barzanî va ke kes nê waştişî ra nêtexelîno, la prosesê naye do aştîwaz bibo. “Cengî proses taloq kerdo, labelê heqê ma hîna esto. Ma do ci ra nêtexelîme. Ma do pê dîyalog biresîme ci. Ma do Bexdad de qisey bikerîme.”

Barzanî giranîye daye ser ke xoserîya kurdan bi şidet nêbeno. “Ganî ma ney etud bikerîme, biaqil bîme, ganî ma bîme yew; ma besenêkenîme şidet bigurenîme, hîna zaf gonî birijnîme.” Cengê duştê DÎ ra ver, îmkanê xoserîye pê têkilîya rind a Bexdadî estbî.

Boyna, Barzanî bale ante mesele ser ke DYA hertim duştê parçebîyayîşê Îraqî de vindetî. Labelê nika bi rolê kurdan duştê terorî de, nameyê Hewlêrî komelê mîyanneteweyî de tehmêde newe girewto. Xeylê duwelan kî dest da fikrê xoserîya kurdanê Başûrî. Goreyê spîkerê parlamentoyê Herême ra, 24 welatan piştgirîya xo bi Kurdîstanêde xoser musnaye. Aye ra teber, senatorê DYA Rand Paulî no hewte da zanayene ke ganî polîtîkaya DYA bivurîyo. “Mi xerîtaya Kurdîstanî newe ra xêz kerdêne û înan rê sozê welatêk bidayêne.”