Serekê Herêma Kurdîstanî Mesûd Barzanî veng da ke êdî wextê defansî vîyarto, nika pêşmergeyî duştê Dewleta Îslamî (DÎ) de her ca de hêriş kenê. Barzanî da zanayene ke şaro kurd her wext hetê aştîye der o, labelê êdî rîyê hêrişê DÎ ra şertî vurîyayê: nika ra tepîya pêşmergeyî kewenê usûlêde hêrişkar.

Barzanî va: “Hêrişê Şengalî ra dime mi emr da pêşmergeyan ke her ca de duştê DÎ de ceng bikerê. Her kes bizano ke pêşmergeyî no kar rind anê ca.”

Heto bîn ra Mesûd Barzanî ewro bi lîderê êzîdîyan Baba Şêxî de ame têlewe. No pêserameyîş de Baba Şêxî derheqê qetlîamê Şengalî de qisey kerd û duştê na trajedî de waşt ke pêro îmkanî bêrê xebitnayene. Barzanî kî ard ziwan ke heta ke çeteyî erdê Kurdîstanî ra nêamey eştene, pêşmergeyî heta nefeso peyên do pêro bidê.

Melumatan ra gore qezayê Rebîa û dewanê Kahîre, Wanke û Welîdî hetê pêşmergeyî û YPG ra ancîya amey peyser girewtene. Pêrodayîşanê giranan de xeylê terorîstê DÎ amey kiştene.

Ney ra kî dot pêsmergeyî duştê çeteyanê DÎ de bi serfirazîye zafê cayanê Şengalî ard binê kontrolê xo. Xebera Basnewsî ra gore pêşmergeyî û YPG pîya Zumar û Şengal peyser girewt. Pêrodayîşan de xeylê endamê DÎ amey kiştene ya kî amey hesîr girewtene, zaf çekî kî kewtî destê hêzanê kurdan.