Cayo ke bombayêda tirke teqaye (Resim: Rudaw)

Serekê hukmatê Kurdîstanê Başûrî Mesud Barzanî hêrişê hewayî yê artêşa Tirkîya protesto kerd û veng da ke nê hêrişî bêrê vindernayene. No hêrişê hêzanê Tirkîya de kî hewt sîvîlê kurdî amey kiştene, înan ra di domanî. Barzanî şî çêyanê (keyeyanê) merdeyan rê serweşîya xo va.

Serekê PDK û serekê hukmatê Kurdîstanê Başûrî Mesud Barzanî hêrişê hewayî yê artêşa Komara Tirkîya ke duştê hêzanê PKK de yenê kerdene, giran rexne kerd û waşt ke nê operasyonê eskerî lerze (leze) bêrê vindetene. Jê (sey) netîceyê hêrişan hewt sîvîlanê kurdan binê bombayan de dinyaya xo vurnaya. Şaristanê Sergeserî de bombayê tomofîl kerdîbî îmha. Tede kî di domanî estbîy.

Barzanî nîya qisey kerd: “Çend roj ê ke teyarayê artêşa tirke bi maneyê PKK ra Kurdîstan bomba kenê. No bombarduman de hewt hemwelatîyê ma bîy şehîd. Na xebere zerrîya ma veşnaye. No hêriş ez rexne û protesto kena. Wa na hêrişkarîye desinde bêro vindetene.”

Xeylê roj ê ke artêşanê Tirkîya û Îranî kampê PKK û dewanê Kurdîstanê Başûrî bomba kenê. Goreyê ajansanê kurdan ra nê bombardumanan de xeylê dew û birrî amey veşnayene.

Çi esto ke pisporanê sîyastetî ra gore nê hêrişê hewayî têkilîya pêt a ekonomî ya Kurdîstanê Başûrî û Tirkîya demêde derg de nêşiknenê. Rojnameyê Rudawî de profesoro amerîkayij ê Unîversîteya Teknolojî ya Tennessee Mîchael Gunter vano ke hêrişê nîyanênî vîyarte de kî estbîy û têkilîya Hewlêr û Anqara ser o zaf tesîr nêkerd. “Mi ra gore têkilîya Tirkîya û Kurdîstanê Başûrî ser o tesîrê nê hêrişanê Tirkîya manaya wextêde derg de çin ê. (…) Faydeyê qet ju (yew) hetî çin o eke derheqê PKK de kunê (kewenê) tê.”