Zîyaretê xo yê Duhokî de, serekê Herêma Federal a Kurdîstanî Mesûd Barzanî reyna giranîye da heqê kurdan ê dewleta xosere ser. Barzanî va: “Ma caran heqê xo yê çarenuştişî ra nêtexelenîme.”
Goreyê xebera keyepelê Herêma Federal a Kurdîstanî, Barzanî bi walîyê Duhokî ame têlewe. Zîyaretê xo de Barzanî yew qiseykerdiş de derheqê heqê çarenuştişê kurdan de nîya va: “Bi hêrişê Herêma Kurdîstanî dişmenê ma bawer kenê ke şarê xo fek heqê xo yê azadî ra verado. Nê kesî rind bizanê ke besenêkenê îradeyo meşrû yê neteweya ma bişiknê. Qet caran ma dewaya xo red nêkenîme. Ma caran heqê xo yê çarenuştişî ra nêtexelenîme. Kes bawer nêkero ke ma fek xoserîya ra veradîme.”
