Serekê Herêma Federal a Kurdîstanî Mesûd Barzanî da zanayene ke kombîyayîşê xo yê vizêrî bi serekkomar Barack Obama û hetkarê serekkomarî Joe Bidenî serkewte bîyo. Rojeve de kî xoserîya Kurdîstanî estbîye.

DYA piştîya temamîya ÎRaqî dana

Kombîyayîşê serekan de bitaybetî asayîş û muşkulatê sîyasî yê Kurdîstanê Başûrî munaqeşe bîyî. Yew mewzû kampanyaya çareserkerdişê problemê terorîstanê “Dewleta Îslamî” (DÎ) û tey ardimê DYA bî.

Texmîn bîyo ke raywanîya Barzanî de rojeve de kî xoserîya Kurdîstanî estbîya. Çi esto ke Obama û Bîden temamîya erdê Îraqî ser o vindetî. Vilaweka Seraya Sipîye ra gore “Serekkomar Obama û Hetkarê Serekkomarî Bîdenî ancîya tesdîq kerd ke DYA bi hêz pişgirîya xo ra seba Herêma Kurdîstanî ya Îraqî û şarê kurdî dewam kenê. Ser o kî tesdîq kerd ke (…) DYA sozê xo ke Îraq goreyê qanûnê xo yê bingeyî demokratîk, federal û yewbîyaye bimano, ey ser o vindenê.”

Aye ra teber, Obama û Bîdenî xirtîya hêzanê kurdan goynaye. No derheq de Barzanî wazeno ke rusnayîşê çekan Bexdad ser o nêbo, wa çekî dîrekt biresê Hewlêr. “Înîsîyatîf nika destê pêşmergeyan der o. Ma besekerd ke warê 20.000 km² destê çekdaranê DÎ ra bicêrîme. Pêşmergeyan besekerd ke efsaneyê DÎ bişikno.”

Barzanî sipasdarîya xo îlawe kerde ke DYA bitaybetî eskerî hetê Herêma Kurdîstanî da. Kombîyayîş ra dime heyetê Başûrî bê konferansê çapemenîye Seraya Sipîye terk kerde. Goreyê selahîyetdaranê kurdan ra, kombîyayîşê bi Obamayî goreyê planî ra zêde derg bî, coka Barzanî lerze şîyo kombîyayîşê xo yo bîn ê Odaya Tîcaretî ya DYA.

“Kurdîstan Welatê Toleransî yo”

Odaya Tîcaretî ya DYA rêxistinanê ekonomî yê tewr girsan ê dinya ra yew a. Tede hîrê mîlyonî şîrketê cîya-cîyayî temsîl benê. Uca Barzanî derheqê rewşa multecîyanê Kurdîstanî de qisey kerd û va ke 1,5 mîlyonî ra zêde multecîyê Îraq û Sûrîye nika Herême de ciwîyenê. “Ez wazena bawerîya şima pê bîyarî ke Kurdîstan do seba înanê ke şidet ra ramenê, seba înan sitar o. Çi dîn çi milet bo, Kurdîstan do welatê toleransî bimano.” Boyna, serekê Herêma Federale da zanayene ke Kurdîstan seba sermayegozaranê dinya rakerde yo.

“Ceng ke Qedîya, Referandum bêro kerdene”

Ewro kî Barzanî beşdarê panelê Enstîtuya Konseya Atlantkî bî û tede ancîya derheqê heqê çarenuştişê Kurdîstanê Başûrî de qisey kerd. Qiseykerdişê xo de Barzanî va, “Ewro bo ya meşte bo, dewleta kurde do bêro awan kerdene. Ma ameyîme sipasîya şarê Amerîka ke nê demê tengasîye de ma rê ardimê xo yê leşkerî pêşkêş kerdo. Rolê Amerîka û koalîsyonê mîyanneteweyî nê cengî de zaf muhîm bî. (…) Cayo ke DÎ teder o, uca demokrasî û azadî çin a. Planê DÎ o bî ke Mûsil ra dime hêrişê Herêma Kurdîstanî bikero, la pêşmergeyî no plan xeripna.”

Derheqê referandumê çarenuştişê Herêma Federal a Kurdîstanî de Barzanî nîya va: “Cengê duştê DÎ de bîyo sebeb ke ma referandum vinderna. Ma hîna ceng der îme. Wexto ke ceng qedîya, referandumê xoserîya Kurdîstanî do bêro kerdene. Qet hêz nêşikîno duştê çarenuştişê şarê kurdî de vindo.”

Resim: BasNews

 

3 ŞÎROVEYÎ

  1. Badê ke ceng qedîya, Bexdad ancî xurt o, ekonomîya ma zî binê cengî de nalena. Wext wextê nikayî yo! Ma ki pawenîme, firsend ma dest ra şino!

  2. de hade keko sıma daima vane eke hebr qediya herb esto falan bêvan.. ee? welat de daima herb esto ma key beme xoser?

  3. Medyaya Başûrî zîyaretê Barzanî hol ercnena. Labelê rastî wina nîya. Biden û Obama qetî va ke Îraq yew bimano, parçe nêbo. BArzanî zî bê şert û bê vindarnayîş destûrê xo seba operasyonê Mûsilî da? Çira? Hetanî nika qet sozê Amerîka çin o ke çekî dîrekt bêrê rusnayene pêşmergeyan. Bexdad beno hêzdar, Kurdîstan binê qalanê Amerîka de manenê Ha vano “xoserîye yena, tenê sebr bikê”. No taktîkê sîyasetî yo ke Barzanî reyna bêro weçînayîş.

Comments are closed.