Barcelona bîye şampîyona Ewropa

Kayêde rindek û biheyecan ra tepîya ekîbo katalan FC Barcelona duştê îngilizan Manchester Unîted de bi 3-1 kot ser û reya çarine bî şampîyonê Ewropa.

Stadyonê Îngilîstanî Wembley de fînal ca girewt, golê Barcelona Pedro (27.), Messî (54.) û Vîllayî (69.) eştî. Golo tek ê Manchesterî kî Rooney deqaya 34. de eşt. Bi no netîce Barcelona 1992, 2006 û 2009 ra tepîya reya çarine bîye şampîyonê Lîgê Şampîyonan ê UEFA.

Manchesterî serê maçî de rind sifte kerd. Labelê deqaya 10. ra tepîya Barcelona hêzê xo musna û kay çîp ard binê kontrolê xo. Harmonîya kayê Barcelona no maç de kî rind gureyaya. Manchester hîna zêde defans de mend. Estareyê înan Gîggs û Rooney na fay besenêkerd ke hunerê xo tam bimusnê. Peynîya peynîye de futbolbazanê Barcelona bi kaykerdişêde ofensîf û çîp ra maç xo rê girewt.

Rojnameyanê Spanya û Îngilîstanî maç nîya şîrove kerd:

• “Marca” (Spanya): Barcelona jê (sey) hewn a!
• “As” (Spanya): Superbarca! Futbolê Spanya tewr rind ê na dinya yo.
• “The Observer” (Îngilîstan): Bravo Barcelona – Sêhrê Messî Unîted kerd parçe û Barca reyna kerde şampîyona Ewropa…
• “Express” (Îngilîstan): Qiral Lîonel Messî bêxeta Unîted kişt.