Serra 2007 ra bi nat reya verên a ke yew nêmfînalê Lîgê Şampîyonan bê FC Barcelona do bivîyaro. Ekîbê Katalonya duştê Atletîco Madrîdî de bi 0:1 kewt bin. Bayern Münchenî (Bavyera Munîh) kî bi 3:1 maç xo rê girewt.
Bi 3:1 Bayern Munîh vejîya nêmfînal. Herçiqas ke Bayernî ofansîf kay kerd, serfirazîye çîp nêameye. Raver Manchester bi 1:0 ver de bî. Antrenor Pep Guardîolayî qerar da ke ekîb giranîya xo bido forvet, Lahmî defansê rastî de kay kerd, la rew verba werte şî. Gude zafane linga Bayernî de çerixîyayêne, ancîya destpêk de zor asa ke Bayern defansê Manchesterî ra bivîyaro. Robbenî di-hîrê reyî teyna ceribna ke raver şêro, nêbî. Hêrişo lez de Valencîayî qafike ra gude eşt kaleya munîhijan: herçiqas ke ofsayt bî, skor hesibîya. Nêmeyo yewin qedîya: Bayernî gol werd, kaleya Manchesterî kî tal menda.
Leteyo dîyin de maç tenêna bî hîra. Manchesterî ceribna ke rew zor ro kaleya Bayernî bikero. Defansê Munîhî tenê bêqewet asa, labelê golê Bayernî çapik ame. O gol ra dime maç bî tenêna biheyecan: ekîbê Bayernî cayê xo rind û hîra gurêna. Robbenî ke pasê Mullerî da, golê 2:1 ey ra ame. Gamê ra dime kî Robbenî bi xo teyna 3:1 ard meydan, skorê xo na ro. Nîya netîceyê maçî hema-hema dîyar bî: Manchester bin de mend û bêhêz Lîgê Şampîyonan ra vejîya.
Kayo bîn de Atletîco Madrîd mecbur mendîbî ke bê goleştoxê xo Dîego Costayî vejîyo sehne. Kayo biheyecan de Atletîcoyî destpêk ra perra ra kaleya Barça. Hîrê reyî ke gude gina dîrege ro, deqaya 5. de Kokeyî golo tek ê maçî eşt. Herçiqas ke Barcelona o ra dime çîp û agresîf kay kerd, defansê Atletîcoyî destûr ci nêda. Leteyo dîyin de ekîbê Katalonya hîna ciddî kay kerd, la ancîya dêsê Madrîdî nêrijîya. Hetta Atletîcoyî besekerd ke mabên de di reyî hêrişê kaleya Barça bikero. Heta deqaya peyêne maçê di spanyolan biheyecan mend, feqet Barça ke nêşikîya hemberê Manchesterî de vejîyo, lîg ra vileçewt vejîya.
Nêmfînalê Lîgê Şampîyonan perojê îne Nyon de bellî beno: ekîbê ke yenê weçînitene Bayern Munîh û Atletîco Madrîdî ra teber kî Real Madrîd û FC Chelsea yê.
