Şima zanenê entegrasyon çik o û nameyê entegrasonî ê bînî çik o? Tirk bîyene, Tirkîyayij bîyene. Şima zaf biaqil ê (!) û şima nê manayan rind zanenê.

Ma derdê mi çik o? Ez şima ra kilmek derdê xo vajî.

Qehremanê vizêrî nika bîyê demokratî û seba Tirkîya demokrasîye wazenê!

Mordemê ke çimê xo estê, la nêwazenê rastîye bivînê, rastîye ra tersenê. Wendoxê ke wendena xo esta, la nêwazenê kay û zurekerîye biwanê, bizanê, tenya wazenê ke menfaatê xo çi ra estê, înan bivînê, biwanê. Sîyasetmedarî, ê dirî yê, sîyasetê zurekerîye kenê, nêwazenê ke kes qalê nê sîyasetê înan ê zur û zurekerîye bikerê, nêwazenê kes nîyet û planê înan ê esasî bizanê, wazenê ke ehmaqan hertim bixapnê. Şoreşvanî bê veng manenê, ebe slogananê ke endî cilqê xo vecîyê, ebe înan qaşo îdare kenê.

Keyeyê nînan û keyeyê wayîrê nînan biveşo! Nînan canê ma werd, emrê ma helêna! Qehremanê vizêrî nika bîyê demokratî û seba Tirkîya demokrasîye wazenê!

Gelo nînan qey şarê ma xapnayî? Qey nîya xapînê? Qey nîya rehet ê? Oxro ke nê qaşo qehremanî vizêrî zî seba hesebanê qijkekan qehremanîye kerde. Şima hîna na fam nêkerde? Şima hîna nînan nas nêkenê? Hazar xeletîye û şaşîye, nêkenê yew rastîye.

Şaşîye û xeletîye çîyêde bîn ê, mixenetîye çîyêde bîn a. Entegrasyon seba Kurdîstanî mixenetî ya! Name serra yo bira-bira, entegrasyon! Yanî, sîstemê dewleta tirke qebul bike, bayraxa tirke qebul bike, miletê Kurdîstanî ra heqê dewletbîyene mewaze.

Na senên demokrasîye û aştî ya ke heqê dewletbîyena miletê Kurdîstanî nêwazena?

Beno ke tayê kesî tersan ra teslîm bîyê, mixenetîye kenê, ma gelê biaqilan (!) şima? Şima rê se bîyo? Şima qey vateyê nînan kenê? Şima seba filankes û bêvankesî bîyê şoreşvan ya seba dewaya Kurdîstanî? Entegrasyon xora hertim dosyaya dewleta tirke de estbî, seba naye qet hewca nîyo ke mordem bibo şoreşvan.

Qalê aştîye kenê, ti vana ma aştîye nêwazenîme. Aştîye û koletîye yew çî nîyê. Qalê demokrasîye kenê, ti vana ma demokrasîye nêwazenîme. Demokrasîye, dewleta tirke û sîstemê na dewlete qebul kerdene nîya.

Na senên demokrasîye û aştî ya ke heqê dewletbîyena miletê Kurdîstanî nêwazena? Na senên aştî ya ke qederê xo tayîn kerdene seba miletê Kurdîstanî nêwazena?

Nê senên mordemê welatperwer ê ke seba Kurdîstanî qet yew statu nêwazenê, biaqilî ci ra hîna vanê serek. No senên serek o ke ziwanê dayîka xo, miletê xo nêzaneno?

Aqilê xo mekerê xizmetê nê kesan. Wela baxçeyê kesî mewerê! Eke wenê zî, qalê medenîyet û modernîye mekerê, şar bi şima huyîno. Eke şima besekenê, baxçeyê ziwanê xo rind, hîra û weş bikerê. Eke şima besekenê, eke şima şikînê, aqilê xo seba kamîya xo, seba rastîya xo bişuxulnê. Helbet o aqil ke şima de esto, helbet şima ke wayîrê nê aqilî yê!

Awa entegrasyonê tirkan axû yo, bira!

Awa entegrasyonê tirkan axû yo, bira! Awa entegrasyonî xenîm bena şimiteyan rê, wayê!

Wayê, bira! Ez şima ra vana!

Gonîya şarê ma seba nê entegrasyonî nêrişîya. Dewê ma, wareyê ma, birr û hêgayê ma seba nê entegrasyonî wêran nêbî. Sîyasetî mekerê qedayê axayê sîyasetan. Binê na tîja ke seba pêro miletan roştîye dana, binê na tîja ke seba pêro welatan beriqîna, zê pêro miletan qey dewleta ma zî nêbo? Na tîje qey seba miletê ma, welatê ma zî roştî nêdo? Tîje roştîya xo ma ser o zî vila kena, la gereke ma roştîya na tîje ra zê dinyaya aleme îstîfade bikîme. No ma rê minasîb nîyo? Ma minasîbê heqê dewletbîyene nîyîme?

Gelo aqilê ma kêmî yo? Gelo aqilê ma qasê şarê Makedonyayî, Qibrisî, Andorayî, Kosovayî çin o? Leminê, Leminê….! Xilemalê dinya!

Rast a ke pepûk ma rê biwano!

3 ŞÎROVEYÎ

  1. Kam ke none tirku wenu asle ho inkar keno toz erzeno rêça ho söno…

  2. To zehf raşt va kek Îlhamî: “Keyeyê nînan û keyeyê wayîrê nînan biveşo! Nînan canê ma werd, emrê ma helêna! Qehremanê vizêrî nika bîyê demokratî û seba Tirkîya demokrasîye wazenê!”

    Heqê dewletbîyayîşî ra fekveradayîş bêbextîya tewr pîl a niştîmanî ya!

  3. Biratiya di navbera Kurd û dewleta Tirka nabe. Rih dibe bost dijmin nabe dost

Comments are closed.