Mi berê na dinya teng û tarîye ra, mi berêne. Şîlîya, şepelîya, girmî û zîngîya hewrana. Hetê ra bûlisk şîrqneno, hetê ra kî tavîya sîyayê Berlînî ser o cêrena. Paytextê Almanya binê teng û tarîye de mendo. Na şîlî û şepelîye êndî canê ma werdo bawo. Na welat de, ma demî, aşmî, roj û saatî kerdî xo vîra. Şand û şodirê nacayî ke, bi şîlîye û şepelîye vêrdî ra, merdim deman kî rojan kî saatan kî keno xo vîra.
Her çîqas ke Îlhami Sertkaya yî binê hukmê germê amnan (hamnan) de xeyal kerdo kî, ma kî bînê şîlî û şepelîye de, binê girmî û zîngîya hewran de û binê tavîya sîyaye de xeyal keme. O ke xêyalî bê pere wê. Bê xeyalan kî nêbeno, de ma se bikerîme bawo?
Na welatê de, roj tersan ra tewr sere xo binê hewranê sîyan ra nêveceno. Wusar û amnan têmîyan de amay û zê gûjgeleka vayî vêrd ra şî. A ropje oncîya şîlîye hem şodir şavaq ra, hem kî cêmê şandî xêle varê. Heq nêkero, raguneyena şîlîya nacayî şikir çîn a. Bawo rêye ke kerd pîro to bê bi dîyar. Na şîlî û şepelîye de kî sebrê merdemî hênî beno teng ke hênî vace. Ge-gane kî bîna merdemî nêna.
Ma emser herhal de na welat de amnan-mamnan nêvînenîme. Amnanê na welatî emser teyna ju hefteye bî. Na wo ma aşma (menge) amnanya pêyene tebaxe derîme, hona ma rîye tîjîya amnanî nêdîyo. Hênî aseno ke ma nêvînenîme kî. Şîlî û şepelîye emanîye re amnanî berda.
Coka ez vana qedr û qimetê welatê xo rind bizanime, çunke welatê ma welatê de hêca wo. Her demê xo, her aşma xo, her roja xo û her saeta xo,… bi rengêra. Lê çi hêyf ke ma kî qedr û qimete na rindekîye honde nêzame.
Şarê man o ke xerîbîye der o, se kenê wa bikerê xo re şorene welatê xo. Bo û pixa şaristanan, bawo canê miletê feqîrî werdo. Hela germê amnanî de na bo û pixe tewr nêna antene. Hama qet nêbo amnan bi amnan xo re şorene welatê xo!
Daviste rojebone kî şorene dewa xo, şorenê şaristanê xo şên û awa kere! Şaristan bi şaristan, dewe bi dewe, ware bi ware, zîyare bi zîyare, ko bi ko, çunde bi çunde, hênî bi hênî, çem bi çem, gole bi gole, daristan bi daristan,… xo re bicêrê. Bicêrêne ke kûl û bîrînên şima wa rehet bêne. Her çî hetê de, awê mayê serdin û zelalî kî hetê de. Hama qet nêbo ju kûlme awa serdine teyna bişime hêcawa.
Ha, şima vir de bo, roje ke raya şima yetê Gimgimî (Varto) ser kewte kî, a nê cayanê ke ez cêr name kena û nusnena, şorenê zîyaret kerene û xo na rindekîya hardê dewrêşî û asmênê kesk ra xo mahrum meverdenê.
Gimgim de cayê ke tewr zêderî hetê miletî ra ênê zîyaretkerdene tayê xo nêwe: Goşkar Baba, Çemê Goşkarî, Çadir Baba, Hazir Baba, Gola Gestemerde, Gola Serde (Gola Sar), Gola Hamurpertî, Koyê Bîngolî, Koyê Koxe, Girê Boxa, Hênîyê Xizirî…
Xora şima ke nê cayî zîyaret kerdî êndî mesele kî nêmanena. Yanê amnanê welatê ma re vatena mi çîn a. Lê amnanê nacayî merdimî verem keno.
Bawo, kamî ke amnanê emser ra xêr dî, ma bi xo xêr nêdî. Lê oncîya kî bi taynîya tîjîya amnanî bimanê weşîye de.
Wusênê Gestemerde
Berlin, 04.08.2012
Birez Wusen mi ave kef u wes nüsne to wend.sa be seva nüsne xo
Siyliye sepaliye vana bira na emser teynî ya nîyake her serre na kamax ê henena.”Mesela sîliye sepalîya xerîbiye nîya mesela hesrete welati yo”
Qêse de miletî esta naye ma per ro piya zaneme”ave watene suqulunge kerda zerre qêfesî aye vat o ax Welat ax Welat” na bî ya mesela ma.
Roca roce ma Welate xo terkit mekerde ne hema ci hef o ke ma kume durrî hona
deje welatî sey vaye koye hazirbawa yî dano rîye u suratane ma ro.
Ma ave nüsne ya cîye serr rast nibe me gere ma xo ra dest cike me sîme
zaf zece xo bicî me perro pîya welate Amnane xo cuyani bike me,zîyar u Dîyarane xo eve Domanane xo sîme îne re meyman bîme..Zîyar e Dîyar ê ma ma perrîne de
HEVAL BÊ.
Birêz Erdoxan Daniş; ez kî zaf bîyane şad ke to no nustê mi bi kêyf weşîye wendo. Mordemê zê şimanê hêcayî ke nustanê ma bi kêyf weşîye biwanê, wûle ma kî nayê ra hêz û qewete cêmê.
Dewîjê mino delal,
tayê çîyî kî mordemî deste nîyê. Kam nêwazeno ke şorone welat, kam? Xora ma kî nustanê xo bi ax û waxa welatî, bi hesret û bîrîya welatî nivisneme. Na hesrete û bîrîya welatî kî ju qûncîkê zerre ma de zê kile hênî vêşena. Na kila zerrê ma kî nêzana êndî çi taw şayînaxora?
Seba nê şîroveyê xoyê delalî weş û war bê.