Cenazeyê hîrê sîyasetkaranê kurdan ke 9. çele paytextê Fransa Parîs de amey kiştene, Dîyarbekir de bi beşdarîya nêzdîyê sey hezarî kurdan rast bîy. Meyîtê Sakîne Cansiz, Fîdan Dogan û Leyla Şaylemez bi sloganê “Şehîd nêmirenê” amey rast kerdene.

Bi hezaran merdim, cinî, cêncî û kokimî şodir ra Dîyarbekir de bi kincanê sîyayan kom bîy. Rojname û televîzyonanê dinya, Tirkîya û Kurdîstanî no kombîyayîş nêzdî ra teqib kerd. Uca de serekê beledîya Osman Baydemîrê bi xemginîye qisey kerd va: “Ma şima roja newroze rê silayîye kerdê, nika şima ra nîya xatir wazenîme. Ewro roja mayan a ke cîgera înan veşena. Ewro roja dejî ya. Ewro roja mayaxorabîyayîşê Rojbîn a. Rojbîn na roje ameye Amed. Ma rê soz dabî ke newroze de yena, nika noca çarna meydanê newroze. Her kes bizano ke şima ke her roje ma ra yew bikişê, ma bi sey hezaran benîme zêde. Raya şehîdanê Kurdîstanî rakerde yo!”

Qiseykerdişê sîyasetkaran ra dime, keyeyê Fîdan Dogan ra pîyê aye qisey kerd, va ke: “Ewro roja mayaxorabîyayîşî ya Fîdan a. Şima no semed ra xeyr amey. No cinayet werteyê Fransa de ame kerdene. Ma wazenîme ke qetilî çapik bêrê dîyene.” Bi nameyê keyeyê Sakîne Cansiz na vilaweke ameye wendene: “Înan aştîye waşte, labelê xayînan ê kiştî. Feqet ma mucadeleyê xo ra dewam kenîme. Ê ke vengê aştîye bîy, bîy vengê şarê kurdî. Kamo ke bawer keno ke ma pê qersunan bêveng manenîme, xelet o.” Keyeyê Leyla Şaylemez ra kî nîya ameye dayene zanayene: “Leyla bîye veyvika Dîyarbekirî. Leyla, Sakîne û Fîdan ewro bîy berz, ê seba xoserîya şarê kurdan serkewt.”

Kombîyayîş ra tepîya cenazeyê Cansiz ver bi Dêrsim, yê Şaylemez bi Mersîn û yê Dogan ver bi Mereş ame berdene. Cansiz bi konvoyê 2.000 erebeyan ra ame berdene bi Dêrsim. Dêrsimijan sûke kerde pirre.

Galerî (seba girskerdiş keremê xo ra resiman ser o bitiknê):

2 ŞÎROVEYÎ

Comments are closed.